WILLEMSTAD – Aktualmente tin dos situashon ku ta di atenshon pa Meteo di Kòrsou i esaki ta laman brutu i tambe e situashon di e volkan na St. Vincent.

Meteo e emití un mensahe di prekoushon (kódigo hel) pa laman brutu ta na vigor pa áreanan di kosta nort i ost di Kòrsou. Análisis di pronóstiko ta indiká desaroyo di kondishonnan di laman brutu ku por menasá partinan di kosta. E kondishonnan aki lo dura for di djaluna, 19 di aprel 2021, 09:10 o.l. te djamars, 20 di aprel 2021, 09:10 o.l.

IMPAKTO ANTISIPÁ:

• 
  

• Resake i/òf bientu fuerte lo kousa laman brutu na kosta;

• 
  

• Ola haltu lo kousa daño na boto chikí, si esakinan keda na tera kantu di awa;

• 
  

• Inundashon di kosta lo kousa daño na fasilidatnan na playa.

• 
  

MEDIDA DI PREKOUSHON:

• 
  

• Ta konsehá usuario di boto chikí pa tene kuidou ora ku nabegá den e kondishonnan aki;

• 
  

• Debí ku inundashon ta probabel den sierto área kantu di kosta, ta urgi doño di fasilidatnan na kosta pa protehá nan propiedat, kaminda ku esaki ta posibel.

• 
  

• Ta konsehá hende ku ta landa pa tene kuidou i no bai leu for di kantu

• 
  

La Soufriere a sigui aktivo durante di último 24 ora i te ku ayera atardi tabatin un erupshon (4:49pm). Na e momentunan ei, e shinishi volkániko tabata move den un direkshon wèst. Segun pronóstiko di Washington, e área di shinishi volkániko aki lo pasa nort di islanan di Kòrsou, Aruba i Boneiru durante oranan di mèrdia.  Riba e imágen por tuma nota di e área pronostiká pa posibel shinishi volkániko.  Pa e motibu aki, servisio Meteorológiko Kòrsou a emití un mensahe di alerta pa e área di responsabilidat di aviashon (FIR).