WILLEMSTAD.- Servisio Meteorológiko Kòrsou ta emití un mensahe di prekoushon (kódigo hel) pa laman brutu. E prekoushon ta na vigor pa áreanan di kosta sùit i wèst di Kòrsou. E kondishonnan lo dura for di awe 11.30 or te 17.00 or

Ta antisipá e siguiente impakto:

-Resake i/òf bientu fuerte lo kousa laman brutu na kosta;

-Ola haltu lo kousa daño na boto chikí, si esakinan keda na tera kantu di awa;

-Inundashon di kosta lo kousa daño na fasilidatnan na playa.

Meteo ta konsehá usuario di boto chikí pa tene kuidou ora ku nabegá den e kondishonnan aki. Debí ku inundashon ta probabel den sierto área kantu di kosta, ta urgi doño di fasilidatnan na kosta pa protehá nan propiedat, kaminda ku esaki ta posibel. Ta konsehá hende ku ta landa pa tene kuidou i no bai leu for di kantu.