WILLEMSTAD.- Direktiva di MFK ayera unánimemente a tuma desishon pa duna Jacinta Constancia e asiento bèk ku el a buta den man di partido despues di e insidente di 23 di febrüari, ora Constancia a dal Giselle Mc William un wanta den kara durante un reunion públiko di Parlamento. Asina lider di MFK Gerrit Schotte a splika ayera durante rueda di prensa di MFK den sede di MFK. “Nos ta duna Jacinta e asiento bèk”, Schotte a bisa. “Pa no solamente e por sigui hasi su trabou komo polítiko. Pero pa e ta e ehèmpel di kon leu agreshon verbal a yega, di un hende ku no a kontené su mes. Nos a eksperensiá e agreshon físiko. Pero awe nos ta siña e lès aki for di dje. Mi ta kere Jacinta no tin un ehèmpel mas mihó ku e kos ku a pasa, i pa nunka mas e lo sosedé.” Schotte a bisa ku e ta kere ku e kambio den bida di Jacinta “pa e eksperensia aki ta trese un mihó Jacinta pa henter komunidat di Kòrsou i tambe MFK.”
Schotte a splika ku e ta spera ku Giselle Mc William su kurason por aseptá e diskulpa di Constancia. “Pasobra e diskulpa ta di kurason.” Lider di MFK a splika ku e ta di opinion ku den e situashon entre e dos parlamentarionan niun hende ta deseá algu malu pa otro hende. “Ni den direkshon verbal, ni físikamente.”
Schotte a splika ku Constancia lo ta presente awe durante reunion públiko di Parlamento. “E ta eligí. Direktiva a disidí pa e por keda ku su asiento. Nos ta kontentu ku el a buta su asiento na nos disposishon, pa nos por disidí lokual nos a disidí.” Segun Schotte e desishon pa Constancia a buta su posishon den man di partido a mustra su grandesa komo persona.