WILLEMSTAD.- Parlamento di Kòrsou a anunsiá ayera tardi, ku a kanselá un reunion públiko ku mester tuma lugá awe 5 di novèmber. A kanselá e reunion te un próksimo aviso. Esaki lo mester tabata un reunion públiko den kua lo a deliberá ku minister di Salubridat públiko, Medio Ambiente i Naturalesa sr. Boekhoudt riba instalashon di un Konseho di Salubridat. Nèt e siman aki sektor di salubridat na Kòrsou ta den momentunan difísil awor ku dòkternan di kas i botikanan a pone trabou i ta atendé solamente kasonan di urgensia. Riba e djaweps aki 5 di novèmber gobièrnu tin un huisio sumario entamá kontra di e asosiashon di dòkternan di kas.

E informe di Parlamento ta indiká ku a kanselá e reunion públiko ku minister Boekhoudt riba petishon di esnan ku a hasi e petishon pa e reunion. Ta un reunion ku a keda di skòrs dia 8 òktober 2026 i ku lo mester a kontinuá awe 5 novèmber.

Ta un reunion ku frakshon di MFK a pidi i awor den e kayente aki a pidi pa kanselá e reunion te próksimo aviso. Ta trata di un reunion públiko pues lo por spera ku frakshonnan di oposishon sigur lo trese e situashon aktual den salubridat na atenshon di e minister i hasi preguntanan.