Mc William:

WILLEMSTAD.- Lider di frakshon di MAN, Giselle Mc William ta lamentá ku frakshon di MFK, KEM i miembro independiente di parlamento, Zita Jesus-Leito no a sostené e petishon durante reunion di Komishon Sentral di parlamento dia 3 sèptèmber pa haña e dokumentonan di e dil entre Refineria di Kòrsou i Oryx Midstream pa lesa. Mc William a rekordá MFK ku durante kampaña e promesa ferviente tabata ku e lo no aseptá akuerdonan di konfidensialidat (“non disclosure agreement”, NDA).

“MFK a bisa ku nan lo kita tur NDA for di riba mesa i lo goberná den tur transparensia ku pueblo i huntu ku pueblo. Mi ke kòrda promé minister ku pueblo ta representá den sala di parlamento”, Mc William ta bisa.

Na opinion di e parlamentario si promé minister a pone konferensia di prensa i splika e motibunan dikon a skohe un otro destinashon pa refineria Isla i dikon a firma ku Oryx, awe lo tabata den un otro situashon. Mc William ke sa di promé minister Gilmar ‘Pik’ Pisas ki dia eksakto a tuma e desishon pa stòp di buska un operadó pa refiná krudo i buska un partner pa meskla produkto.

“A bati èks direktor di RdK, Marcelino Chonky Delannoy i su famia pasobra oposishon no ke a tende nada otro ku ta habri refineria pa refiná krudo, pero awe e mesun partidonan aki ku awor ta den gobièrnu ta tuma desishon ku no ta refiná mas pero ta bai meskla produkto i no ta duna informashon i konsulta ku pueblo.”

Mc William ta mustra ku tin un konfushon rondó di e intenshonnan di Oryx. “Durante e ‘roadshow’ di promé minister i otro ministernan a bisa ku Oryx lo tuma 3 aña pa disidí si nan lo refiná krudo. Den un publikashon den prensa sinembargo direktor di Oryx Curaçao Holding, Dean Rozier ku ta èks miembro di MFK, a bisa ku lo no refiná produkto.”

Mas aleu e lider di frakshon di MAN a para ketu na e akusashon kontinuo ku ta gabinete Rhuggenaath a sera refineria. El a splika: “Novèmber 2016 e tim multidisiplinario bou di gabinete Whiteman a firma un akuerdo ku lo no sigui mas ku PdVSA i ku pa 1 yanüari 2020 Guangdong Zhenrong lo bira partner nobo pa refineria.”

Segun Mc William na 2017 promé minister interino Pisas mes a bai China i hiba kombersashon ku Guangdong Zhenrong i tabata di akuerdo pa nan bira operadó nobo di refineria entrante 1 yanüari 2020. “Na 2019 ya kaba tabatin 2 aña ku PdVSA no tabata refiná krudo pasobra no tabata haña produkto debí na sanshonnan kontra Venezuela.”

E echo aki, Mc William ta sigui bisa tabata un kiebro di kontrato di PdVSA. Asina mes e kompania venezolano a pidi pa prolongá nan kontrato ku 1 aña. “A ofresé nan 6 luna ku posibilidat di prolongashon di 6 luna mas”, pero PdVSA no a aseptá.”

Den e kuadro aki Mc William ta puntra su mes kiko lo a pasa si PdVSA a keda 1 aña mas pasobra te awe PdVSA no por saka un barí di produkto for di Venezuela. Konsekuentemente e ke sa di Pisas ki dia e promé barí di produkto den kuadro di e dil ku gabinete Pisas a sera ku PdVSA ta yega Kòrsou.

Ta trata di e dil ku gabinete Pisas a traha dunadó PdVSA un deskuento di 450 mion dòler riba nan debe di 900 mion dòler. E dil ta inkluso produkto na balor di 21 mion florin pa paga un debe ku a keda atras na trahadó i penshonadonan.

Finalmente Mc William a ilustrá su ponensianan ku e manera kon MFK su posishon riba e instituto Hulandes TNO a kambia. “Antes a bati TNO relashoná ku e proyekto Un Horizonte Nobo, pero ainda TNO ta partner pa desaroyá e proyektonan parke di panel solar i produkshon di hidrógeno bou di gabinete Pisas II.”

Foto: