WILLEMSTAD.- MAN-PIN niun momento ta kontra desaroyo di pais, pero polítikonan mester stòp di kere ku nan por tuma pueblo hasi. MFK a primintí ku den 3 luna ta habri refineria i awe ta pusha den stoma di pueblo un kontrato di 30 aña pa meskla (“blend”) produkto so i konsekuentemente no ta bai refiná krudo i traha produkto manera e.o gasolin, “gasoil”, “jetfuel”,  èts.

Ku otro palabra no ta bai start e unidat kual ta kurason di refineria esta “catcracker” i plantanan asosiá. Na 2013 Parlamento a pasa un moshon kaminda gobièrnu mester informá parlamento riba kada paso di desaroyo rondó di refineria. Posishon firme di MFK den oposishon tabata ku no ta permití pa separá Bullenbaai fo’i operashon di Emmastad i esun ku kier Bullenbaai mester demostrá promé ku e por operá Emmastad.

Pero awe ku MFK den gobernashon no ta bai start niun planta na Emmastad pa refiná krudo i traha produkto final. Pasobra ta duna e kompania Oryx Midstream 3 aña pa studia si ta bai start refinashon na Emmastad, pero Oryx ta haña Bullenbaai pa e traha plaka kuné. Oryx Midstream ta bai tuma trahadó ku ta den servisio awor aki, pero e loke a primintí lagando 3.000 hende inskribí pa haña trabou, a resultá awe un promesa falsu.

E echo ku ta bai meskla produkto no tin mester di e mesun kantidat di trahando ku ora ta bai refiná produkto.

Akusashon

Mas aleu MAN-PIN ta refutá akusashonnan ku ora e partidonan tabata den gobièrnu a sera e refineria. Ta gobernashon anterior a disidí ku no ta prolongá e kontrato ku PdVSA ora ku esaki a terminá 31 desèmber 2019. Na fin di 2019 ora a ofresé PdVSA 6 luna pa kontinuá i ku posibilidat di prolongashon ku 6 luna mas, pero PdVSA a ninga esaki.

MFK mester stòp di tira falta riba otronan pasobra nan no a logra hasi loke a primintí e pueblo aki. Ainda mas, MFK tin asina tantu kurashi di skohe pa no informá pueblo i pa no informá parlamento riba loke a firma ku Oryx Midstream. Den e kaso aki nos por mira kon èks promé minister i aktual “minister van staat”, Maria Liberia-Peters (PNP) a mustra bon kla ku e loke ta hasiendo ta kontra reglanan di bon gobernashon.

Sentral sindikal SSK i sindikato di trahadónan di kontratista tambe a ekspresá nan preokupashon mirando ku loke a firma no ta loke a primintí pueblo pasó e kontrato riba mesa ta enserá final di refinashon na Kòrsou.