Charles Cooper:

WILLEMSTAD. - Charles Cooper un di e persona nan ku a sinta na mesa di negoshashon pa yega na un akuerdo di gobernashon, a splika ku Movementu Futuro Kòrsou (MFK) ta sinti nan honra ku pueblo a duna nan 9 asiento i a duna un mandato kla kua direkshon nan ke bai.

E dianan tras di lomba, delegashon di MFK a sinta na mesa ku delegashon di Partido Nashonal di Pueblo (PNP) pa yega na un gobièrnu pa Kòrsou ku mester bai enfrentá retonan difísil ku MFK ta sigur, ku nan por atendé ku e retonan aki, pa pueblo i huntu ku pueblo. P’esei Cooper ta di opinion ku e gobièrnu aki ta di  Pueblo i lo goberná pa i huntu ku pueblo. Un gobernashon mester ta huntu ku pueblo Cooper ta bisa, pa motibu ku asta ora ku gobièrnu mester tuma desishonnan difísil, ku kisas no ta tur hende ta di akuerdo kuné, e echo ku ta traha ku pueblo, e pueblo lo komprondé dikon mester tuma tal desishon. Esaki ta e forsa di MFK ora ku goberná  huntu ku pueblo.

Cooper ta agradesido ku e delegashon di nan futuro partner den gobernashon. PNP su delegashon tabata fuerte i ku a negoshá duru ku dos pia riba tera.

E negosiashonnan a konsentrá riba formashon di un tim pa por enfrentá e problemanan grandi ku e pais aki ta aden. Den un tempu rèkòrt a logra e promé fase. P’esei awor rápidamente lo kuminsá ku e di dos fase, kaminda ku lo yama ekspertonan lokal pa yuda deliniá e programa di gobernashon.

Finalmente Cooper a bolbe enfatisá ku esaki ta un gobernashon di pueblo, pa pueblo i huntu ku pueblo. Pues e kompas ta e programashon di gobernashon di PNP i e programa di gobernashon di MFK.