WILLEMSTAD.- Manera indiká  den e aktual akuerdo di gobernashon, partidonan lo sòru pa e sirkuito gris i pretu tambe kuminsá kontribuí nan granito na nos komunidat. P’esei lo hasi sierto ahuste na entre otro e lei di Omzetbelasting. Ku un sistema mas simpel pa kontrolá i ku sirkuito gris i pretu kontribuyendo na nos komunidat, lo por suavisá otro aspekto nan di impuesto pa stimulá ekonomia i empleo. Esei di akuerdo ku drs. Javier Silvania durante su presentashon e siman aki den un enkuentro ku prensa.

Overdrachtsdossier

Segun Silvania, pa gabinete Pisas por kuminsá ku su trabounan, ta importante pa nos tin un bista kla di tantu kasonan andando di Ministerio di Finansa, komo den e presupuesto. Komo ku nos ta den un tempu di krísis, nos mester utilisá kada un dia pa traha pa bienestar di pueblo di Kòrsou. Pa e motibu aki nos mester por disponé di informashonnan nesesario pa nos por traha.

Segun Silvania, usualmente na momento ku gobièrnu nobo sinta, nan ta haña disposishon di informashonnan di pais. Den e kaso aki, nos ta den un situashon di krísis. P’esei ta importante ku for di awor por haña akseso na informashon importante pa partidonan por kuminsá pensa riba solushonnan pa ku e défisit den presupuesto.

Partidonan ta urgi minister di finansa Kenneth Gijsbertha pa proveé e informashon aki di moda ku por sigui ku e trabounan di pueblo, pa pueblo.

Den e último 4 añanan, ekonomia di Kòrsou a konosé un kontrakshon ekonómiko di 27%. Desde aña pasá mundu ta enfrentá un krísis di salú okashoná pa e vírus di Corona, e asina yamá pandemia di COVID-19. Pa protehá humanidat, paisnan na mundu riba konseho di entre otro Organisashon Mundial di Salú a tuma vários medida entre otro sera frontera, introdusí un toke de keda ku tur e konsekuensianan ku esaki tin pa funshonamentu di nos ekonomia. Esaki a krea aún mas urgensia pa likides.

Segun Silvania, pa suavisá e impakto di e medidanan aki, protehá e kapasidat produktivo di nos pais i garantisá operashon di gobièrnu, gobièrnunan a rekurí na finansiamentu di programanan di reskate i estímulo ekonómiko.

Meskos ku práktikamente tur pais na mundu, gobièrnu di Kòrsou tambe a rekurí na finansiamentu pa suavisá e impakto di e medidanan ku nan a tuma. Pero komo nos leinan di konsenso ta obligá nos gobièrnu pa primeramente buska finansa serka gobièrnu Hulandes, gabinete Rhuggenaath a entamá kombersashonnan ku Hulanda pa haña ayudo finansiero pa asina nos por suavisá e impaktonan di e krísis di salú aki.