Den karta pa Konseho Supremo Elektoral

WILLEMSTAD. - Den un karta ku Presidente di MFK, Sithree van Heydoorn a manda pa Konseho Supremo Elektoral awe mainta, nan ta lamantá ku nan tin di konstatá ku palabrashonnan hasí pa partidonan mantené nan mes na dje relashoná ku presensia di COVID-19, no ta keda respetá.

Den nan karta, MFK ta indiká ku  teniendo kuenta ku e situashon aktual di COVID-19, partidonan polítiko a bai di akuerdo pa trese kambionan den e forma ku normalmente ta atendé ku e proseso elektoral.

Entre otro a bai di akuerdo ku partidonan polítiko lo no pone representante na urnanan elektoral i ku tampoko lo repartí flyer na e diferente urnanan i asina tin mas akuerdonan ku nos a yega na dje. E palabrashon nan aki a ser pone den un karta dor di Konseho Supremo Elektoral fecha 15 di mart 2021 ku a ser manda via di mail pa partidonan polítiko.

MFK ta lamentá ku apesar ku a hasi e palabrashonnan aki pa nos por tin e konfiansa i siguransa ku e proseso lo kana transparente, MFK ta konstatá ku na diferente urna tabatin violashon di e palabrashonnan hasi entre Konseho Supremo Elektoral i partidonan polítiko. Esaki ta laga un smak amargo atras, ku apesar di e akuerdonan ku a yega na dje, tòg a trata sea konsiente òf inkonsiente di stroba hendenan di hasi nan trabou manera e palabrashon ta.

P’esei pa medio di e karta aki van Heydoorn kier hasi un apelashon riba Konseho Supremo Elektoral, pa tuma e medidanan apropiá relashoná ku loke a sosodé awe mainta no ripití su mes awe nochi ora urnanan será.

MFK ta indiká ku nan ta konfia ku Konseho Supremo Elektoral lo tuma e medidanan apropiá i ku nos hendenan lo haña akseso den e lokalnan di votashon sin ningun opheshon di parti di ningun di esnan ku tin outoridat na e lokalnan.

MFK a mantené su mes na e palabrashon nan hasi durante di e diferente reunionnan, entre Konseho Supremo Elektoral i partidonan polítiko.

MFK ta eksihí pa Konseho Supremo Elektoral tambe mantené i kumpli ku e palabrashonnan manera akordá den reunion di 24 di febrüari i 4 di mart 2021.