Awe ta elekshon pa direktiva

WILLEMSTAD.- Partido MFK a pasa un siman largu den kurso di formashon enfoká riba liderato i komunikashon (‘public speaking’). E eksperto ekuatoriano, Carlos Obando, tabata esun ku a duna e kurso. Lider di frakshon di MFK, David Seferina, ta indiká ku e kurso ta parti di esfuersonan di partido pa yuda fortifiká miembronan.

Parlamentarionan, ministernan i tur kolaboradó di partido a partisipá na e kurso ku a tuma lugá tur anochi di djaluna te ku djasabra di 6or pa 9or di anochi. Esaki, ku eksepshon di djárason siman pasá durante bishita di promé minister hulandes, Rob Jetten. Djárason 13 di mei promé minister di Kòrsou, Gilmar Pisas, a tene un reunion ku Jetten. Esaki a tuma lugá na Landhuis Verdenberg.

Na e okashon ei a papia riba diferente tema relashoná ku kooperashon den reino entre otro uso di energia renovabel, invershon den barionan vulnerabel, e situashon geo polítiko i otro temanan di interes komun pa Kòrsou i Hulanda. Despues di e reunion Jetten a sera konosí ku e miembronan di e Konseho di Minister i Parlamento di Kòrsou. Durante un resepshon ku a sigui ámbos mandatario, huntu ku presidente di Parlamento Fergino Brownbill, a dirigí nan mes na e invitadonan.

Seferina ta mustra ku Obando ta rekonosé internashonalmente pa su kursonan di liderato. Segun lider di frakshon di MFK tabata un siman intensivo di trabou i kurso anochi. E siman di kurso a tuma lugá nèt promé ku MFK a selebrá su 16 aña di eksistensia. A hasi esaki djadumingu último ku un santu sakrifisio di misa parti mainta siguí pa un selebrashon te 3or di mèrdia.

Elekshon

Awe, djamars 19 di mei, ta otro dia importante pa e partido pasobra ta dia ku ta tene elekshon pa direktiva nobo. A habri vakatura pa tur puesto den direktiva, inkluso e puesto di presidente. E kandidatonan pa presidente ta miembronan di Parlamento Javier Silvania i Ramon Yung, i èks parlamentario i aktual enviado spesial na Brussel, Eduard Braam.

Silvania, Yung i Braam a pone nan mes alabes eligibel pa un puesto den direktiva, konforme e posibilidat ku statuto di partido ta duna pa hasi esaki. Otro miembronan ku tambe a pone nan mes komo kandidato pa drenta direktiva ta parlamentarionan Juniel Carolina, Sandy Losiabaar, Rogoletto ‘Rigo’ Thodé i Brownbill. O’Dennis Daal, Merceé Doran, Kelvin Kimmenaede, Michael Levenstone, Alexander Molina i Gerda Willems ta kompletá e lista di kandidatonan ku a postulá nan mes komo kandidato pa drenta direktiva.

E elekshon lo tuma lugá 7or di anochi na World Trade Center i no na sede di e partido. E elekshon pa direktiva, pa tur klaridat, no ta inkluí e posishon di lider polítiko di partido ku ‘qualitate qua’ ta forma parti di e direktiva.