WILLEMSTAD.- Minister-presidente di Kòrsou Eugene Rhuggenaath ayera a bai serka sra. Gobernador i a entregá retiro ofisial di su gabinete. E gabinete pues ta demisionario. Rhuggenaath a splika ku gobernador tin e retiro di su gabinete, manera ta kustumbrá, ‘den beraad’. ‘Mientrastantu el a pidi gabinete demisionario pa keda ehersé tareanan i atendé ‘lopende zaken’ na bienestar di pais’, asina Rhuggenaath a splika. Segun e lider di PAR awor e ta spera e resultado di elekshon i e desishon di gobernador.
Rhuggenaath ayera a yama danki na su gabinete. El a splika ku el a entregá retiro di su gabinete ku un sonrisa riba su kara. Pa motibu ku, segun Rhuggenaath, e ta un ‘mishon kumplí’. ‘Nos a primintí un stabilidat i ku esei nos a kumpli.’ Si e ta mira bèk minister-presidente Rhuggenaath ta splika ku: ‘Si nos lo no tabatin tantu krísis pa dil kuné por ehèmpel Venezuela, situashon finansiero, COVID-19 nos por a logra muchu mas.’ Pero tòg Rhuggenaath tin un sentido di satisfakshon. ‘Nos no a wanta kos. Den e último kuater aña nos a tuma desishon den tempu difísil ku e trabou ku nos a hasi. Nos sa ku ainda nos ta mei mei di un krísis i tin hende ku tiní difísil. Pero nos a sa di krea perspektiva si. I ta awor pa e siguiente gobièrnu pa sigui e trabou.’