WILLEMSTAD.- Segun Promé Minister sr. Hensley Koeiman, e no por kere ku niun hende lo por tin problema pa laga pueblo disidí den un elekshon kiko ta su pensamentu, basá riba e situashon ku ta reina aktualmente. Pasobra tin un pensamentu ta biba eifó i tin kosnan ku a kambia di un forma drástiko i ineksplikabel. Anto pueblo tambe tin hopi pregunta. Tin hopi pregunta, hopi doló, hopi tristesa i asta rabia den e pueblo aki pa e manera ku kosnan ta kanando, segun e mandatario. Awor tin un responsabilidat ku polítikonan tin di asumí. Polítikonan ku ta bisa ku nan orea ta serka e pueblo, ta straño ku por skucha diferente informashon for di e mesun pueblo.

Segun e minister, durante e reunion tin parlamentarionan ku a pidié pa pasa man na su kurason i ehekutá sierto moshon. El a kontestá bisando ku semper e ta pasa man na su kurason durante su sesenta añanan di bida. Den su bida semper el a sali na interes di pueblo, no awor ku el a bira polítiko. Semper el a yuda riba tereno sosial, den deporte, den bario, ku hende grandi, traha kas pa hende pober via di Fundashon Drecha Kas. Pues su man semper a pasa na su kurason! Pues e ta hopi orguyoso di e parti ei di su kualidatnan komo hende.

Pues ta bon tambe pa wak e historial di tur hende ku bai elekshon. Wak kiko nan a yega di hasi pa pueblo promé ku nan a drenta polítika.

Pa loke ta e moshonnan ku tabata den tapara, Koeiman a bisa ku, un moshon den Parlamento ta un deseo di parlamentarionan. I no nesesariamente un moshon mester tin base hurídiko pa por ehekut’é. Awor si ta pidié pa e pasa su man na kurason, e tin di bisa for di awor ku e no por hala aden e Landsbesluit pa tene elekshon, pasobra nos Konstitushon ni nos Reglamento Elektoral no ta duna outoridat pa kanselashon di un elekshon ku a ser yamá kaba.

Kòrsou ta un estado di derecho. Mayoria no por mina un derecho, i tin di keda denter di e límitenan di e derecho, mester keda atendé ku nos leinan.

Un desishon pa hala aden elekshon ta algu kontra di nos Areglo di Estado. I tur hende a huramentá ku nan lo respetá Areglo di Estado.