Angela Becker ta konta di su yu; “un bon mucha”

WILLEMSTAD.- Pèrdida di un yu ta un doló pa su mayornan sigur i pèrdida di un yu asina hóben ta hasi e doló aun mas grandi. Benjamin Becker a pèrdè su bida djabièrnè pasá den un aksidente ku bròmer riba Schottegatweg Nort. El a laga atras un mama kibrá. Angela Becker a konta EXTRA ki tipo di yu Benjamin tabata.

Benjamin ta un mucha trankil, alegre, e ta traha duru pa bai dilanti.

E djabièrnè atardi ei, dia 21 di yüni Benjamin a bai traha i atardi el a bin kas ku e bròmer. Su mama a bisé pa no bai ku e bròmer pa tuma su diploma pero pa bai ku nan den outo.

Benjamin sinembargo a subi su bròmer, el a bai kumpra paña i bin kome bèk purá purá pa e bai. Esei normalmente no ta su hasí.

Sra. Angela Becker a pidi su yu pa e bai trankil i esaki a bisé ku e no ta pasa di brùg pero e ta pasa di Schottegatweg. Benjamin a keda masha bunita e dia ei, tur na pretu bistí i su mama a bisé tambe kon nèchi el a keda.

“Mi a keda papia kuné i pidié pa  e bai trankil pasobra mi sa kon e ta, e ta gusta su bròmer. No ta tur ora e ta riba bròmer i e ta kore masha trankil pero ya e dia ei el a kore duru’, Angela a bisa EXTRA.

Angela ku ta den ròl stul despues di un aksidente aña pasá, a bai kaminda e seremonia di graduashon lo a tuma lugá sperando Benjamin. Pero na e sitio e tabata mira tur mucha ta drenta i e no ta mira su yu.

El a kuminsá yama telefòn i a keda yama te ora polis a atendé e yamada. Asina Angela a haña sa ku su yu tabata den un aksidente. El a tende di e aksidente promé, pero el a tende ku tabata un skuter i no por a kere ku ta su yu. “Mi no tabata ke pa nada pasa mi yu i mi a kere ku no tabata e pero tòg tabata e”, Angela Becker a bisa.

Benjamin ta un mucha ku ta tende, e ta úniko pa su mama. E no ta kore brutu pero ta gusta su bròmer i skuter. El a bende su skuter i a bisa ta bai kumpra outo, pero direpente a kambia i a fia un bròmer i a disidí ku e ta bai kumpra bròmer.

Benjamin tabata kue su djòp warda su sèn pa e kumpra su bròmer, ta asina e ta.

Pa Angela e pèrdida di su yu ta duru. Ta un mucha di 18 aña, hóben, e ta algu duru.

El a bisa EXTRA ku e no a mira e video ni potrètnan ku a bai rònt di su yu den aksidente. Te na momentu ku EXTRA a entrevistá Angela e no a wak su yu ainda. Ta ayera tardi el a bai mir’é.

El a tende si ku e persona ku a graba e video, a graba tur kos. Sali for di su outo, trapa den sanger i graba Benjamin te den su kara kompleto. “Mi no ta komprondé kon tin hende sin heful sin eskrúpulo na e mundu aki. Nan tin di kòrda ku nan tambe tin famia, nan tin yu i nan tin ruman, bo tin di kòrda riba e kos ei, e hende por a fayesé kualke manera pero no por hasi e kos ei asina. Ta doló pa e famia”, asina Angela a enfatisá den e entrevista ku EXTRA.

Angela su mensahe ta na hóbennan pa tende di mama. “Si mama bisa no bai riba e bròmer i bo hasi e kos ei, no hasié pasobra mama ta sinti. Un mayor sa kiko ta bon i malu i tin bia bo tin gana di hasié pero mihó no pasobra e por tin su konsekuensia”

Entiero di Benjamin ta djadumingu awor for di 1 or di mèrdia na Consolador na Brievengat.