WILLEMSTAD.- Ku hopi emoshon ayera nochi, Kòrsou ta konosé su emblema nobo, “Mi Pais, Mi Orguyo” di Andresita Monart a resultá ganadó den e mas di 200 partisipantenan ku a kompetí pa yega na e emblema nobo pa Kòrsou.

Un shou kaminda a duna homenahe na nos artista Ced Ride (q.e.p.d.) riba Plasa Brion, gobièrnu di Kòrsou a anunsiá e emblema nobo.

E 10 finalistanan tabata Mi Pais, Mi Orguyo; Kaminda mi Lombrishi ta sera; Herensia Kultural; Konektá; Naturalesa ta Kòrsou; Un pueblo iluminá: Nos fortalesa; Dushi Kòrsou, Para fuerte riba nos mes; Amor i pas kalor di kas.

Símbolonan nashonal manera himno, bandera i eskudo ta sumamente importante i ta yuda den e parti di krea emoshon i konstrukshon di e sosten popular nesesario pa logra desaroyo duradero na nivel nashonal i di himno i bandera. Nos eskudo aktual ta un símbolo ku ta data for di tempu di antaño i no ta kuadra ku e tempu djawor mas, i e no ta kontribuí na e kultura nesesario pa realisá desaroyo duradero pa Pais Kòrsou.

E eskudo aktual a keda introdusí na 1964 pa e tempu ei remplasá e seyo di West-Indische Compagnie ku te na e momentunan ei tabata ser usá komo nos eskudo aktual. Esaki pa añanan a fungi komo nos logo i símbolo di teritorio insular di Kòrsou. Pero di otro banda mester bisa ku Kòrsou ta un pais outónomo for di 10-10-10 i komo tal ya nos no konosé e parti di Bestuurscollege mas. I esei tabata motibu pa gobièrnu a tuma e desishon na aña 2020 pa start e trayekto pa yega na un emblema nobo pa Kòrsou i ku ta identifiká e situashon estatal aktual i tambe pa duna un refleho di nos kustumbernan.

Konsientemente gobièrnu di Kòrsou a skohe e fecha di 10 di òktober ku ta dia ku nos ta selebrá outonomia di nos pais, pa na e okashon aki hasi e anunsio dje emblema ganadó. I p’esei a hasié festivo ku kompañamentu di músika kaminda diferente artista a presentá.