…Nominado pa diferente premio pa aktuashon, awe nos ta sera konosí un tiki mas ku Ayrton Kirchner. Hóben yu di Kòrsou, bibá na Hulanda, studiá den ramo di aktuashon, a tuma parti na diferente obra di teater i riba su nòmber diferente premio i nominashon. E tabata studiando na Kòrsou International Business na UoC/UNA, den su di dos aña di estudio el a sinta pensa ku e tin gana di kaba e estudio ei pero e no sa si e lo kab’é. E tabatin mas interes den sali traha, hasi kos pa e mes ku e tabatin den estudio. El a hasi un tèst di eskoho di estudio i e tòp 5 resultadonan a sali; kantante klásiko, aktor, kabaretera, ‘teathermaaker’, regisseur. Nunka el a kere ku esei lo tok’é, pasobra semper el a pensa kiko e tin di aber den e mundu di aktuashon, e mundu kreativo siendo su tata ta un hende artístiko i kreativo. Nunka Ayrton a pensa den e direkshon ei.

Kuminsá aktuashon na Kòrsou

Ora el a bai mas aleu pa wak kua di e 5 eskohonan ei e lo bai den dje, a sali e parti di aktuashon. El a kuminsá buska kon pa e bira aktor. E kier a bai Merka i p’esei e ta kosta 18 mil dòler pa aña i esei e no tabatin i no tin finansiamentu di estudio pa esei. I p’esei el a kuminsá buska na Hulanda. Miéntras tantu den e temporada di 2011 el a bai La Tentashon aki na Kòrsou, bou di direkshon di John i Segni Bernadina i el a studia algun luna e base di aktuashon. Despues di einan el a bai hasi su oudishon na Teather school Amsterdam i el a keda aseptá. Ayrton a hasi esei un aña i despues oudishon pa diferente skol di teater na Hulanda, un di nan tabata na Utrecht i einan el a bai hasi su estudio di aktuashon na 2012 (HKU).


Rol di Nelson Mandela tabata impreshonante

Ayrton no a traha solamente den oranan di teatro manera el a bisa Djasabra, pero tambe den tur kos ku tin di aber ku televishon manera pelíkula, seri, propaganda. For di 2015 el a kuminsá komo aktor profeshonal. Den e añanan ku e tabata kabando skol i hasi un produkshon profeshonal di teater. Ta den tantu  produkshon di teater ku Ayrton tin tras di lomba, esun ku mas a toke ta e ròl di Nelson Mandela. Ayrton a kontestá e pregunta ei sin pensa, pasobra e ròl ei tabata esun ku mas a toke manera el a bisa nos. El a aktua komo Nelson Mandela den un monólogo di teater na De Nieuw Amsterdam, den Nieuwe Kerk na Amsterdam. Esei a toke mes. E historia di Nelson Mandela, espesialmente e temporada ku e kier a bira presidente, tabatin e kontakto ku su kasa e tempu ei Wini Mandela, pa splik’é ku su vishon ta otro for di e vishon di Wini Mandela. E monólogo ku Ayrton a aktua ku ta skibi den e outobiografia di Mandela, tabatin un anochi ku el a sinta ku Wini Mandela i nan tabatin hopi diskushon. Einan el a papia hopi di su pashon di ántes pakiko el a lucha, pakiko el a kai sera, kon el a sintié tempu e tabata sera, kon el a sintié pa ku su kasa i su yunan i na momentu ku el a Sali i tabata bezig ta traha pa bira presidente kon e ta sinti i kiko ta su vishon pa Zùit Afrika. Esei tabata algu impreshonante i Ayrton nunka mas ta lubidá esei.

3 siman pa prepará

Pa personalisá un ròl manera di Nelson Mandela segun Ayrton lo mester a tuma tempu pero pa e okashon aki e tabatin solamente 3 siman pa prepará. Un otro ròl mester a personalisá Mandela, pero e no tabata por mas komo e mester a hasi otro produkshon i asina a aserka Ayrton. I el a bisa si mesora. E mesun anochi, un skript di 12 página el a pasa aden i e mainta siguiente el a bisa e direktor John Leerdam ku e ta kla pa e ròl di Nelson Mandela. A dun’é 3 siman, nan a bin huntu 5 pa 6 bia so, nan a repasá 2 pa 3 ora kada bes ku a topa otro i por lo demas tabata Ayrton ku a sinta riba lèptòp buska tur informashon di Nelson Mandela, buska videonan di ántes di Nelson Mandela, bukinan i tur loke e por a haña. Ayrton a sinta wak hopi kos, hopi material di video, hopi material di lesa pa e sinti kiko Mandela tabata pensa sierto momentu. Kosnan ku Mandela mes a skibi i pa asina sa su motibu ora e papia algu. Simplemente ora e papia i duna entrevista kiko tabata Mandela su pensamentu, kiko e kier a trese dilanti i kon e ta tres’é dilanti. I ora el a sa e kontenido el a bai e parti eksterior di Mandela su mirada, kon e ta papia, kon e ta kana, kon e ta bira i wak pa asina ora e personifik’é e ta realmente Nelson Mandela.

Sèn sèn sèn

Ayrton a terminá VWO na MIL i niun momentu el a pensa ku awe e ta kaminda e ta awe. El a pensa tempu e tabata na MIL, el a imaginá su mes un akountent. Pa e temporada ei sèn tabata den su kabes i pa despues e no tin niun problema. Ta sèn so e tabata pensa ariba. I e kier a bira register accountant. E kier a bai Hulanda bai studia i bai Kòrsou bèk pa e gana bòshi plaka. Esei Ayrton a pensa e tempu ei. I awe siendo un aktor Ayrton a bisa ku tin momentu e ta pensa e eeee mare e por a sigui e kaminda aya tòg i asina e lo tabatin hopi mas sèn i bida lo tabata mas fásil, pero e no ta kere ku su bida lo tabata mesun diversifiká ku e ta awor aki. El a bisa ku e género ku e ta aden, e vak ku e ta hasi di ta aktor ta algu ku tur dia ta diferente, tur luna ta diferente, tur aña ta diferente. Algun siman pasá e tabata riba kaminda pa un propaganda ku ta bai sali otro luna, dos siman despues e tabata preparando pa un presentashon teatral na un lugá grandi i despues e ta riba un otro obra teatral.

 

Mi pashon ta konta

Ayrton ta bezig ku su pashon i ora bo ta bezig ku bo pashon si bo ta echt kere den e pashon ei i kere den e historia i e kuenta ku bo ke konta i loke bo ke trese dilanti pa públiko, e sèn no ta importá. Naturalmente e ta importante pasobra e tin di kome i paga su kosnan, pero den su mes paden profundo e no ta bai tokante di sèn pero e pashon i e loke e ta krea. Sea den propaganda òf pa un obra teatral, pelíkula òf seri ta esei ta konta pe na e momentu ei.

E mundu ei ta difísil

I komo konseho na e hóben ku su pashon ta aktua, pinta, arte, e ta bisé pa hasi. Sigui bo kurason, sigui e pashon ei i no ta importá unda bo kuminsá basta bo kuminsá. Kuminsá i sigui. Si bo no kuminsá kisas aki 10, 20, 30 aña bo ta pensa mihó mi a kuminsá e tempu ei. Kuminsá semper un kaminda i sea habrí, menta habrí, kurason habrí pa sa unda bo ke bai, kiko bo ke hasi i kiko ta e opstákulonan. “Esaki mi tata semper a siña mi. Mi tata semper a bisa mi ku nos ta para bo tras pero sa ku ta un mundu difísil”, Ayrton a bisa. Den último 10 aña tabatin hopi momentu ku e kier a entregá pero tòg el a sigui. Maske kon chikí e paso ta, Ayrton ta bisa na hóbennan pa hasié tòg. Tuma e paso ei pasobra asina ta kuminsá kana. Si bo no kuminsá gatia  lo bo no por kana.

 

Investigá direkshon di estudio promé

Ayrton a bisa ku na prinsipio el a hasi un investigashon pa sa kua estudio ta klòp pe. El a bisa ku esei ta masha importante pa hasi. Dia el a bai studia International Business su investigashon tabata hopi chikí. E tabata ke hasi acountancy. Te ora el a studia un amiga den dje ku tabata studiando kaba i el a wak e bukinan i el a spanta. Ta yen buki diki. El a pensa pa bai algu otro ku ta un tiki ménos. E sa ku e ta bon den rekenen i idioma i asina el a bai den direkshon di International Business. El a bisa ku ta posibel ku e hóben ku a kaba skol ta skohe algu i kambia despues. E ta kere ku investigashon ta hopi importante. Investigá kiko bo ke hasi, kon bo ke hasié, kon bo ta logra yega einan i kiko ta e pasonan ku tin di tuma. Promé ku tuma un desishon final i ku tòg ta bai sinta ku algu ku bo no tabata ke.

E bida no ta fásil

Pa loke ta e bida na Hulanda, Ayrton a bisa ku esaki no ta nada fásil. I esaki pasobra ta otro kultura, otro wer, na Hulanda bo no por bai Hulanda manera bo ke i ménos laman blou tin einan. Tur kos ta diferente, áwaseru ta kai hopi, ta sea hopi friu òf ta hopi shinishi. E hendenan ta otro i bo tin di haña bo manera kon pa bo bida i pas na Hulanda. Kon bo ta pas ku bo meta, ku bo estudio, bo trabou, bo vishon, bo soñonan. Kon ta pas den tur e hendenan na un pais ku ta hopi mas grandi ku Kòrsou pero hopi chikí kompará ku Fransia òf Spaña òf asta Merka. Na Hulanda tur kos ta na ora, tur kos ta nèchi reglá i bo mester sòru pa bo tambe ta na ora. Ta algu poko difísil espesialmente si bo ta leu for di famia i prinsipalmente pa esnan ku no tin hopi famia na Hulanda. E ta konsehá pa keda di focus na Hulanda.

 

Invertí bèk den Kòrsou

Ayrton ta wak su mes aki 10 aña su soño ta pa aktua den un pelíkula internashonal, den un seri internashonal, den un produkshon di teater òf musikal internashonal i ke invertí bèk den Kòrsou. E sa ku tin algun kolega i amigu (a) ku ta bai Kòrsou i ke invertí bèk den nos hóbennan òf den hende grandi ku ta interesá den aktuashon i teater, algu artístiko. Esei e tambe ke bai Kòrsou pa hasi.

 

LAGA UN KOMENTARIO

Please enter your comment!
Please enter your name here