Na diferente okashon nos por a mira e hóben Khalil Guribaldi durante di ruedanan di prensa di gobièrnu, hasiendo su preguntanan na su manera. Khalil òf Khalili tin Ons Radio ku tambe ta hasi ‘streaming’ di tur e ruedanan di prensa di gobièrnu di Kòrsou. Nos kier a konosé e hóben aki mas di aserka, ken e ta i kon bini Khalili den prensa.

 

Fo’i chikí…

Khalil na palabra;  for di chikí mi a mira media i mi kier a bai den mundu di media. Mi ta dinámiko, aktivo, kontentu, mi ta un hende aktivo den hopi kos. Mi estudio realístiko ta Horeka i dor ku horeka no ta loke mi tabata ke hasi, mi a sigui mas aleu, e no tabata mi pashon i mi a kambia bai den direkshon di media.

 

Tras di kortina…

Khalil a sigui splika mas aleu na Djasabra ku el a bai Mediaschool i un di su plannan ta pa bai mas profundo den media pero sirkunstansia na Kòrsou no tin e plataforma pa echt studia media. Tin si pa studia i bira periodista pero no media. Den aña di pandemia di COVID-19 por a konosé Khalil mas. Pero e tin hopi tempu den media. El a kuminsá na 2016 den media, trahando tras di kortina na kanal di televishon i di einan el a bai radio. El a kuminsá na un radio emisora i kosnan no tabata bayendo bon i el a bai mas riba su mes.

Esun ku mas ta atraé ta para dilanti di kámara i hasi entrevista. I segun el a bisa mas tantu e partinan di hasi reportahe i entrevista ta e kosnan ku mas e ta gusta.


Su forma di funshoná…

Durante di ruedanan di prensa por tende e hóben aki ta hasi bastante pregunta. El a splika nos su forma di funshoná den media. Hopi bes no ta sinta den sapatu di e hóben pa puntra kiko e hóben ta pensa. I esei ta loke e komo hóben ta saka preguntanan. E hóben mester komprondé kiko ta prensa i kiko ta notisia i e kier hasi un diferensia pa e hóben por komprondé esaki.

 

Ta mi mes preguntanan…

Den mayoria kaso por tende Khalil bisa durante di ruedanan di prensa ku ta hóbennan ta hasié pregunta pa e por presentá. Pero e tabata masha sinsero ku ta e mes ta bin ku su preguntanan pero ta hasié ku e pensamentu di un hóben. E ta hasi notisia ku mentalidat di un hóben, pa asina e hóben por komprondé kiko e ta trese dilanti i enfoká komo informashon.

 

Komentarionan ofensivo…

Riba Khalil su preguntanan hopi bia tin komentarionan no masha agradabel pa e hóben aki. El a bisa Djasabra ku e ta sigui e komentarionan  aki si pero e no ta wòri mashá ku nan. Tur hende tin derechi di komentá i si ta un mensahe konstruktivo nan ta mand’é e ta tum’é pasobra asina e ta siña. El a bisa di ta habrí pa tur komentario pero e ta kere semper ku rèspèt. I importante ta ku loke bo ta hasi hasié bon pa hende komprondé bu. Tin komentario e ta hopi ofensivo tambe i no agradabel. E kos ku mas ta hùrt Khalil ta ora ta papia kos malu di trabou di media pasobra e no ta bon pa nan.

 

Falta mas pa siña…

Khalil ta papia di nos komo prensa pero e ta kere si ku e falta muchu mas pa siña den prensa. E no por bisa ki ora e lo bai sigui traha pa yega mas leu. Pero e ta mira su mes ku e por nifiká algu pa media. E ta haña ku e ta hasiendo un bon trabou komo hóben.

 

Ons Radio…

Su radio yama Ons Radio Curaçao ku ta unu ‘online’ i e ta papia konstante riba dje. E tin su shou mainta i den dia ta sigui normal. E tin notisia, su programanan edukativo pa hóbennan. E tin un tim ku ta su mama, ku por sierto ta fundadó di su radio, Khalil ta esun ku ta manehá e radio i tin Angelica Parris ku ta yud’é i otronan ku tambe ta yud’é i sostené. Tin hopi hóben ku ta bai hasi programa serka Khalil. Su radio ta un hòbi. Su meta ta pa e hóben sa kiko e notisia tin mas tantu di ofresé.

 

Pregunta ta importante…

Khalil su studio ta na kas pero ora e rueda di prensa tuma lugá, kaminda e ta e ta bai ‘online’. Loke ta importante pe ta e pregunta ku e ta hasi. I tin hopi hende, sigur mil hende ta siguié ria Facebook group.

 

Mi ke ta un hende konosí den media…

Khalil a yega di pidi medianan un chèns pa e traha serka nan pero semper no tin lugá. E ta mira su mes na un medio di komunikashon pa asina e por siña mas tantu. E ta atraé pa traha ‘online’ i e ke pa hendenan mir’é tambe. El a bisa di ke yega hopi leu komo personalidat, komo hóben i pa hendenan sa ku e ta un hóben ku a kuminsá chikí i pa bira un periodista/lokutor/presentadó. E ke bira un hende konosí den media. Un persona ku e ta su ídolo den prensa ta Angelica Parris. E ta un di Khalil su guianan.

 

EXTRA lo gui’é…

Ku un bos abou Khalil a bisa ku hendenan no ta tum’é masha na serio i esei e ke kambia. E ta un hóben di 22 aña i ke pa hende tende i tum’é na serio. I esun interesá na dun’é un man entre otro e parti finansiero ta bon biní sigur serka Khalil. I komo tal nos di Djasabra/EXTRA a komprometé nos mes pa guia Khalil mas aleu den su trabou entre otro ku ideanan briante ku e tin.

 

Pinturanan di studiantenan Instituto Buena Bista

Nos studio di grabashon nobo a keda estrená tambe di e forma aki. Ku pinturanan di hóbennan di Instituto Buena Bista; Georgerig Sling Hans a pinta Aros ku Webu, pintura riba kanvas di un grandura mas di un meter haltu i un meter hanchu, e otro di Guenna Gustina ku su Untitled Weaving Tapesty traha di hilu i e di tres di Javon Luidens titulá El Taurus Has Fallen tambe pintura riba kanvas grandura 30 a 40 centimeter. Esun ku ke mas informashon di e pinturanan aki i di e instituto por mail na [email protected]obuenabista.com

 

 

 

LAGA UN KOMENTARIO

Please enter your comment!
Please enter your name here