WILLEMSTAD,- ‘Mi ta hopi ansioso kon e hende na Kòrsou lo reakshoná riba mi buki. Den e buki mi ta papia kompletamente habri tokante mi bida. Tokante sèks, relashon ku hòmbernan i muhénan, tokante mi trabou komo prostituta, mi ròl den un organisashon ku a trafiká droga, mi tempu den prisòn. Tur kos. Kompletamente habri. Esaki no ta kustumber aki na Kòrsou.’ Asina Nyorka Lindeborg, mihó konosí komo Nina L., a bisa den un entrevista ku EXTRA. Nina ta na Kòrsou den kuadro di e buki ‘Maffiameid’ (Dama di Mafia) ku ta basá riba su bida.

‘Na Ulanda mi a haña hopi reakshon for di hendenan ku konosé mi. Nan tabata sorprendí di tur kos ku ta skirbí den e buki. Mi por imaginá mi ku na Kòrsou tin hopi hende ku ta interesá den e buki. M’a nase na Kòrsou, mi tata ta di Kòrsou, mi eks-frei tabata un trafikante di droga hopi konosí. I mi mester bisa ku mi mes ta hopi notorio aki. Asina taku  mi por imaginá mi ku hopi hende lo lesa e buki. I por ta duna reakshon.’

Nina ta splika ku e no ta kompletamente di akuerdo ku e manera ku outor di e buki a skirbi su relato. ‘Hopi palabranan na Papiamentu no ta korekto skirbi i na mi opinion tin hopi atenshon pa hende ku mi a konosé brevemente. Mi ke men tin hopi atenshon pa mundu kriminal na Kòrsou i Ulanda. Esaki tin komo konsekuensia ku tin hopi relato di mi ku no ta den e buki.’ Segun Nina awor e ta den preparashon di un dokumental tokante su bida. ‘Mi ta spera ku hopi hende lo wak esaki tambe. Tambe e hende ku no ta gusta lesa buki.’