Demanda di 15 aña

WILLEMSTAD.-  E akusado venezolano Cesar Cumare Villavicencio di 27 aña,  a keda akusá ayera di ta un di esnan ku a tira riba eks boseronan di kuerpo polisial Huggings  i tambe Suares dia 31 di mei 2016.

Ta trata di e kaso Paseata ku ayera a keda tratá den korte di promé instansia.

Villavicencio ta keda akusá pa un total di 8 kaso di atrako brutal.

El a keda sentensiá na un kastigu di 6 aña na luna di aprel último pa un atrako brutal den un bibienda den Castorweg huntu ku otronan.

Ayera durante tratamentu di e kasonan, e akusado a ninga tur akusashon i  a bisa hues ku e no sa di kiko nan ta papia.

Segun hues e akusado ta keda akusá ku riba e fecha ariba menshoná el  a kometé otro atrako huntu ku otronan na Paseata.

Segun e doño di e negoshi dia 31 di mei 2016 algun hòmber  a drenta su lugá, bula tras di e tonbank i bai ku 350 florin i menasá e komersiante ku un pistol.

E eks boseronan polisial ariba   riba e dia menshoná  a mira algun hòmber kore sali. Un di e hòmbernan  a kore bai riba  Huggings ku un arma den su man ranka  su pòtmòni ku tabata kontené 50 florin  i 32 dòler nèt ora el a kaba di pin. Despues nan a dirigí un pistol riba Suares i lòs un bala riba dje.

Mesora e agente Suares a lòs tiru bèk riba e malechornan ku a kore bai. Pa ku e akto aki Villavicencio ta keda akusá di ta esun ku a lòs e tiru riba Suares i atraká Huggings

Pa loke ta trata otro akusashon, Villavicencio ta keda akusá  pa destrukshon den  prizòn SDKK na momento ku el a kòrta e tralinan i trata na hui for di e instituto.

Bewakernan atento a haña e akusado riba dak huntu ku un otro prezu ku nèt a trata na pone laken pa hui.

E akusado a bisa ayera e motibu ku el a trata na hui for di prizòn tabata pasó e ta kansá di kome 3 bia pa dia den e instituto miéntras ku e no sa si su famianan ta komiendo na Venezuela.

Tambe el a bisa ku e ta kansá ku e no ta haña atenshon médiko, despues ku polisnan a  agredié malamente durante su detenshon.

El a bisa ku e ta wòrdu tratá manera kachó i tin 6 luna ku 7 dia será den kashòt i mag di “lucht” solamente 2 ora pa dia.

Segun e akusado e tabata saka sanger i a warda hopi pa hasi tèstnan médiko i ta wardando 3 luna pa e resultadonan.

Fiskal a haña tur e akusashonnan probá. Fiskal a bisa entre otro ku e akusado a tira riba 3 agente polisial di kual un di nan a haña bala.

Mirando tur esakinan fiskal  a demandá e akusado na 15 aña di prizòn teniendo kuenta ku e 6 añanan ku el a keda kondená pe.

Hues lo tuma desishon dia 17 òktober binidero.