Algu ku a kuminsá manera un hòbi, awe ta resultá den arte. Paluarte ta para pa arte di palu. No simplemente un skalchi pa pone salada, pero muchu mas ku esei, ta loke Hugo Shak Shie a konta Djasabra. Nos a bishit’é na su atalier na Kwartje. “Semper mi tabata traha ku palu. For di chikí mi tata tambe ta traha su mes kosnan i asina mi a kuminsá tambe. For di chikí traha ku palu. Tempu mi tabata studia na Ulanda mi ta traha mesa pa otro studiante i ora mi a bin Kòrsou na 1978 tambe mi tabata traha. Mi a traha kama, komode pa yu, un trabou di karpinté pero pa hòbi pasobra mi trabou mes ta di mener di skol. 9 pa 10 aña pasa tempu mi tabata prepará pa baha ku penshun mi a pensa pa un hòbi. Mi no kier a hasi e trabou di traha kama etc., ku no ta pa uso so i mi kier a bai hasi algu mas kreativo. Mi hòbi ta palu. Palu ta algu natural i asina bo ta reforsá bo relashon ku naturalesa”, Hugo a konta nos.

Satisfakshon....

Asina 8 aña pasá Hugo a kuminsá traha ku palu pero den forma di arte. Antes schrijnwerker tabata hasié pero no komo arte pero mas bien pa speilu pa kama etc., etc. Hugo kier a bai den direkshon kreativo. Kreashon ta algu ku bo ta sinti parti di dje. I e ta duna bu satisfakshon inmenso si bo por ta kreativo. E ta diferente di rekreashon. I pe e sistema aki ta stimulá interes den nos mes naturalesa. Tur su obranan ta traha di Kòrsou su palunan. E ta haña e palunan ora nan kai òf ora hende kap esakinan. Tin obra traha di palu di kenepa, i por mira ku tabata un palu putrí. I esei Hugo ta gusta pasobra tin algu natural den e palu. E ta hasi e obra algu úniko. E no ke traha skalchi pa salada pasobra esei no tin nada kreativo den dje. Tur su obranan tin algu natural den dje. Tin obranan traha di palu di mespel. “Mi ta purba saka e bunitesa di e palu i no ta kita nada di dje. Mi ta pone solamente zeta den dje pa mantenshon di e palu. E forma mi ta duna e palu riba un draibank i ku un beitel esaki ta keda drei i e ta kob’e te ora e haña e forma ku e ke. E ta kuminsá skur e palu pa e ta glat. E ta bira algu ku ta atraé hende su bista. Tur hende ke mishi ku su obranan pasobra e ta atraktivo i hende ta wak pinturanan den e obranan”.

Kada obra ta tuma nan tempu. Hugo tin di kolekta e palu promé i e ta kuminsá ku traha algu pa e doño di e palu. Esei e ta hasié komo gratitut. E no ta paga pa palu pero e ta traha algu pa e hende ku a dun'é e palu.

Palunan di Kòrsou....

Segun Hugo mayoria palu di Kòrsou por usa ku eksepshon di palma. Komo Kòrsou ta seku e palunan ta kompakto i hopi duru. E palunan di Kòrsou ta diferente di Oropa. Kòrsou su palunan ta masha duru por ehèmpel e wayaká ta e palu di mas duru na mundu. I e por traha ku nan tur i e ta lombra mas ora e palu ta mas duru.

Kada palu tin su bunitesa....

Tabata masha difísil pa Hugo bisa kua palu ta mas fásil pa traha kuné. E ta traha ku tur palu pasobra kada un tin nan mes bunitesa. E ta meskos ku hende, no por bisa ken ta mahos i bunita pasobra kada hende tin nan bunitesa. Kisas un hende ta mas perfekto físikamente pero un otro por komuniká mihó i meskos palu. Kada palu tin su eksigensianan a traha kuné., Palu di mango ta un palu suave pa traha kuné. Un palu duru manera mespel ta hinká bu den un otro ambiente pa traha kuné.

Nada purá purá....

Trahamentu ku e palunan no ta algu ku por hasi pura pura, pero mester tene koutela pa asina por tene e parti pafó di e palu intakto. Meskos Hugo a bisa kada palu tin su koló i por mira asta sierto palunan ku tabatin bestia den dje i por mira e burakunan ainda. E tipo di palunan ku tabatin bestia den nan, no por traha un skalchi kuné.

Hugo a splika ku mayoria palu por usa pa skalchi pa salada pero ora e traha un skalchi pa salada e ta usa un zeta ku ta apart i ku ta bon pa pone kuminda aden. Pero den su kaso e no sa traha masha skalchi pa salada. “tin biaha ora mi kue un palu, hende ta bisa e palu ei ta mahos i kon e por traha kuné. Pero ta nèt e palunan mahos ei ta duna obranan masha bunita”, segun Hugo a bisa Djasabra.

Eksposishon i benta mañan

E atalier di Hugo ta hopi variá. I awor e ta partisipá na ferianan di artesania. Mañan dia 3 tin unu den plasa Nobo di fundashon Pashonista ku ta trese tur artesano huntu. Mañan tambe lo tin un pida eksposishon di su obranan den un ofisina den Plasa Nobo. E lo tin einan obranan ku normalmente e no ta bai kuné. E feria ta di 1 or pa 6 or di atardi mayan djadumingu. Pero Hugo sa partisipá den diferente feria por ehèmpel den temporada di fin di aña.

Hugo no ta traha eskultura di hende pero e ta saka loke e palu ta duna. I el a mustra nos di Djasabra un eskultura ku el a traha saka di un palu di indju i remarkabel ta ku e ta mustra di ta un kurpa di hende. Tabata un kasualidat ku e figura a Sali den forma di kurpa di un hende.

Interes den naturalesa....

Ku e eksposishonnan i ku su atalier e ta purba pa hendenan haña mas informashon di nos palunan. I lanta interes pa hende den naturalesa i pa hende por rilèks. Tur esei por sosodé den naturalesa. Pa Hugo e trahamentu ku palu aki ta relah’é. I e ta kere ku mester siñ’é na nos hóbennan. E ta konsiente ku últimamente tin hopi interes lantando pa traha ku kosnan resiklá i asina kuida nos naturalesa. Ku esaki por bisa ku e konsenshi ta lantando serka nos hendenan pa resiklá i konservá nos naturalesa.

Hende lokal ta gusta su obranan...

Ku satisfakshon Hugo a bisa ku mayoria di su obranan ta keda kumpra pa hendenan lokal. I e hende lokal ta keda asombrá di e bunitesa ku por saka di nos palunan.

Hugo Shak Shie

Paluarte

7675373