WILLEMSTAD.- Partido Trabou pa Kòrsou TPK (TPK) ta sospechá ku tin ‘aanwijzing’ na kaminda pa Hustisia. Esaki segun su lider Rennox Calmes.

E konklushon aki TPK ta yega na dje ora mira kon stratégikamente prensa hulandes a bin ta trese notisia rondó di e kadena hudisial. Prensa hulandes ta pintando un senario kaótiko i tambe koruptivo den e kadena hudisial. I stratégikamente ta hasi Kuerpo Polisial e punto di atenshon.

Ta bèrdat ku KPC a sufri último aña ku a pasa. Calmes ta bisa ku meskos na tur pais i Hulanda, esaki ta e kaso.  Esaki ta mustra ku KPC no ta tolerá kos robes den e kuerpo. Di otro banda akshonnan ku ta yuda Hulanda ku nan ‘aanwijzing’ ta ku ainda gobièrnu, no a buta un minister di Hustisia. Ainda no tin un hefe di kuerpo nombrá.

Un parlamentario ta purba limpia su nòmber pa e bira minister di Hustisia, pero e kos a resultá pió. Un parlamentario ta hañ’é den konfrontashon ku polis. Tur esaki ta nèt reseta di lokual Hulanda ke. Pa hasi e situashon parse mas kaótiko, prensa hulandes a skohe e kaso di 600 kilo pa skibi tur tipo di kos manera ku ta nan mes ta reshèrshi, Rennox Calmes ta enfatisá.

Prensa hulandes ta skibi entre otro ku tòpnan den KPC i hefe di tim di aresto ta korupto i tabata metí den e robo. Ku e strategia aki ta purba kibra bon nòmber i integridat di kurason di e kuerpo. Ta parse ku prensa hulandes a lubidá ku tur hende ta inosente te ora prueba ku e ta kulpabel. E daño ku ta kousando na imágen di Kuerpo sin mas ta grandi.

Pero pa TPK esaki ta parti di strategia pa Hulanda drenta den e kadena hudisial pa medio di un ‘aanwijzing’. Ta importante pa si bo ke dominá un pais, pa dominá su hustisia. Minister di Finansa ya a demostrá kaba ku ta pro Hulanda e ta.

Calmes; Rekomendashon na MFK pa nombra un minister di Hustisia i un hefe di kuerpo mas lihé ku ta posibel.