WILLEMSTAD.- E akusado Rolangelo Eranio (36) akusá di a sende e víktima Raymond “Raymi” Casimiri na kandela dia 3 di yüni 2017 ku konsekuensia fatal, a bisa ayera ku aparte ku e tabata fadá i furioso ku e víktima i su amigunan, pa motibu ku nan tabata tira piedra riba dak di kas di su mama, e tabata rabiá den e dianan ei tambe, pasó e presidente di Merka Donald Trump i e konosido rèper Rick Ross, no a manda pag’é e 300 mion dòler di sèn di kampaña ku nan tabata debe.
Segun e akusado ku ta sufri di e malesa króniko di “phychotische stoornis”, paranoia i ta halusiná, e mester a yuda traha e kampaña di Trump ku a priminti’é ku e ta manda e sèn, pero esaki no a sosodé.
Segun e akusado esei a pone ku e tabata basta rabiá riba e asuntu nèt e dia nan ei.
Tambe el a bisa ku e mester a investigá e asuntu di “iluminatie”, debí ku e ta un testigu di Jehova.
Hues Edelenbos ku a trata e kaso, a puntra e akusado ku si e no ta haña ku e tin ku usa medikamentu, pa motibu ku rapòrt sikiátriko ta papia di su malesanan mental.
Segun e akusado, e no ta haña ku e mester usa medikamento, pa motibu ku e ta bon bon na su kabes.
El a bisa ku na Ulanda el a hañ’é ta usa vários remedi obligatoriamente.
Pero e no ke sigui hasi esaki, pa motibu ku ta medikmanentonan ku tabata ser usá den tempu di Hitler den segundo guera mundial.
Segun akusado e tin miedu di usa nan, pasó tiki tiki e medikamentonan por kaba ku su bida.
Mas aleu el a duna di konosé ku tur hende ta wak Casimiri so, pero niun hende no a wak kon nan tabata yama su mama “bati kibra” i molestiá su mama diariamente.
Segun e akusado, el a kansa i p’esei el a kometé e akto aki.
El a bisa tambe si Trump i Rick Ross lo a pag’é e lo no a hañ’é den e asuntu aki.