Jeandra Ayala a organisá na desèmber i yanüari 2 tayer Curls ‘N Flights. Tepnan balioso pa damanan ku e kabei natural i hopi krùl i tambe kiko tur tene kuenta kuné ora ta biaha. Jeandra ta biba i ta terminando su estudio na Hulanda pero a kuminsá aña pasá ku un proyekto di tayernan pa duna tep. Na Hulanda e ta bezig aktualmente ku dos master ku ta Clinical Psychology i tambe Forensic Psychology. E aña aki ta Jeandra su último aña di estudio.  El a skohe e estudio ei pasobra e ta kurioso pa sa dikon hende ta komportá nan mes na sierto manera i tambe e komportashon kriminal ta parse algu hopi interesante. I komo hòbi el a skohe pa e tayernan menshoná di Curls ‘N Flights. “Mi vishon di bida ta ku bo mester tin bo trabou pero banda di esei bo mester tin algu pa dibertí bo mes i relahá un poko i esei mi ta hasi ku e biahamentu i mi workshopnan”, Jeandra a bisa Djasabra.

Di straight pa kabei natural...

Pa algun aña kaba tin un moveshon pa loke ta kabei natural.  Jeandra ta kòrda ku el a straight su kabes tempu e tabatin 12 aña ora tur hende tabata den föhn kabei ku eseinan i e tambe tabata ke esaki. Despues di un aña el a kansa i tabata ke su bòshi kabei bèk i einan tiki tiki el a kuminsá kòrta, hinka den modèl,  pinta pero tòg riba dianan di fiesta ku mester föhn kabei pa e tin e largu i nèchi. Pero ora Jeandra a bai biba Hulanda el a stòp di föhn e kabei i a bai kompleto di nobo ku kuido i trato di e kabei natural, kuminsá paga tinu kiko e ta hinka den su kabei, sòru pa e produktonan ku e ta usa no tin Sulfate ni Parabens ni Silicona den nan. Asina tiki tiki kuminsá dediká mas tempu na su kabei, dun'é amor, sinta lesa tur kos online, sigui e influensianan riba YouTube pa asina eduká su mes i trese e edukashon di kabei natural pa nos hendenan na Kòrsou.

Kabei natural ta hopi kuido...

Kiko ta e diferensia entre kuido di kabei natural i e kabei di straight. Jeandra a konta nos tin un diferensia den esaki. E ta haña ku e kabei natural mester di hopi mas atenshon. Por ehèmpel ora föhn e kabei e ta keda nèchi pero ku e kabei  natural no ta simplemente pone awa den dje i ta kla. Tin hopi kuido tras di dje. Den su kaso loke ta yuda masha bon ta ‘deep condition’ su kabei tur siman, sòru pa ora e saka kònòpi e ta kuminsá hasié ku su dedenan promé i despues ku un ‘detangle brush’ tiki tiki, sekshon pa sekshon. Sino e kabei ta kibra hopi lihé. Tin hende ta kere ku e término di kabei duru ta kabeinan masha fuerte mes kaminda nan kabei ta esnan di mas delikado den e mundu di kabei natural.

Kabei bon i malu...

Kabei bon i kabei malu manera nos a lanta ta tende, kiko esaki ta nifiká pa Jeandra. El a splika Djasabra ku den boka di pueblo ora e kabei ta 8 por 8 ta kabei tipo 4. Den su kaso, e ta tipo 3 di kabei esta esun ku krùl i loke hende tin bia ta kalifiká komo bon kabei. “Mi ta haña ku e hende ku su kabei tipo 4 ta asina bunita, kaminda por e wak nos rootsnan di kaminda nos a bin i kon tiki tiki e transformashon kaminda e hende ta stòp di straight su kabes i kuminsá dediká tempu i e tipo 4 ta keda hopi bunita”, Jeandra a splika. Esaki ta eksihí si hopi tempu, hopi sèn pasobra no ta den un dos tres ta haña e produktonan ku ta traha pa e kabei. Mester tene kuenta ku e elastisidat di e kabei, porosidat di e kabei, kada hende su kabei ta diferente i kisas dos ku kabei tipo 3 pero tòg por ta diferente. Ta kosnan chikí chikí ku bo tin di tene kuenta kuné ora ta trata di kabei natural. Jeandra no kier a bisa ku hende ku no tin tempu i sèn no bai kabei natural, pero pa tene kuenta ku e kímikonan ku ta usa ora ta straight e kabei ta pió. Ta kuestion di tuma un tiki tempu i dediká na e kabei i esun ku stima su kabei no ta wòrdu ku e sèn tempu i dedikashon pasobra e ta bale la pena.

Lesa etikèt promé...

Jeandra ta analisá produktonan bon promé e kumpra nan pa su kabes. E no ta djis wak e etikèt pero e ta lesa e ingredientenan pa mira sigur sigur no tin produktonan manera Parabens, Silicone i Sulfate ku ta dañino pa e kabei.

Fleksibilidat ora ta biaha...

Flights ta e otro tema ku Jeandra ta elaborá ariba den su tayernan. Kiko ta e kos di mas importante ku tin di tene kuenta kuné pa por subi avion. Pa Jeandra fleksibilidat ta di gran importansia. Ku esei el a bisa ku ora tin fakansi di skol preisnan ta haltu, na e momentu ei por tin algun dil aki i aya pero no masha barata. Pa por biaha  mas kumbiniente tin di fleksibel den dianan ku ta biaha òf no. Tambe tin diferente wèpsait ku por usa manera Skyscaner, Expedia, ta kaminda por akumulá punto pa despues por haña  deskuentonan. Meskos bo por haña via e wèpsaitnan ei mes e diferente opshonnan ku tin, e diferente kompanianan di aviashon. “Hopi bia nos ta pensa ku ora nos ta biaha nos tin di drenta na punto A i sali na Punto B. Kaminda si bo desviá un  poko kaminda ta bai B, D i kaba na C kisas e por kumbiní mas. Dos aña pasa novèmber ora mi a bin Kòrsou mi a sali di Hulanda bai Montreal i di einan bin Kòrsou. Esei a skapa mi sigur 400 Euro”, asina Jeandra a bisa den e entrevista ku Djasabra.  E ta un poko largu pero esun ku ta gusta biaha i gusta eksplorá lo no wòri hasié. Den su kaso el a yega di bai Canada promé pero nunka Montreal. Einan el a haña chèns di skapa sèn i konosé un otro parti di un pais ku nunka bo a pensa di para einan. I e mesun biahe ei ora di bai bek el a bula di Kòrsou a Chicago, Washington i bai Amsterdam. Tabata ratu pero tòg mas kumbiniente.

Shòp promé kumpra...

Jeandra ta rekomendá ku promé ku kumpra un pasashi, shòp un tiki i subi Skyscaner wak kiko nan por ofresé i wak e opshonnan ku e tin pa biaha. Tin momentu asta por bèl un liña aéreo pa wak si nan tin vuelonan ku ‘Overlays’ i asina por skapa sèn i eksplorá otro parti di mundu.

Djis tene kuenta...

Diferente tep ta loke Jeandra ta papia di dje ora di biaha. Por ehèmpel el a splika ku e no ta biaha pikete bisti pero si mas konfortabel bistí. Ademas tin di tene kuenta ku mester pasa kòntròl i tin di kita yen kos i pe e manera di biaha mas dushi ta dor di biaha na e manera di mas konfortabel. Tambe ta masha importante pa un maleta di man pasobra tin di tene kuenta ku semper algu por bai robes. Den e maleta di man pone skeiru djente, dos sèt di paña di abou, t-shirt, mea ya si algu bai robes e tin un stòk ku por usa si algu pasa ku e maleta mes. I ounke Jeandra no ta rekomendá unda biaha, e ta bisa si pa kòrda ku no ta Miami so tin na Merka, no ta Orlando su tin na Merka pero tin hopi mas lugá pa bishitá. Amplia e horizonte. E ta kòrda ku un bia e tabata loko loko pa bai un kaminda ku nunka el  a bai promé. Skol/universidat di Leiden kaminda e tabata ofresé biahe pa Slovenia. Nunka el a ni tende di dje pero a bai. Semper tin un otro parti di mundu ku no ta e lugánan konosí pero eksplorá, sera konosé otro kultura i wak bida di otro forma. I pe no ta importante e wer ku tin na e lugá ku e ke bishitá na e momentu ei. E pensamentu ei e tin teniendo na kuenta ku na Hulanda ni maske ta sneu, áwaseru ta kai òf solo ta sali, bo tin di sali kas.

Hopi mas...

Den su tayernan e ta duna un splikashon di e wèpsaitnan ku e ta usa, ki momentu por buk mas mihó, e ta siña e partisipantenan kon pa wak e fluktuashon di preisnan, tambe pa chèk ki wèpsait ta bon òf no, durante di COVID kiko tur tene kuenta kuné, kua wèpsait pa subi ariba. E ta duna kuido di kabei natural entre otro no tin mester di biaha ku e produktonan ‘full size’. Por kumpra bòter chikí i yena esakinan. Esaki lo yuda skapa kilo den maleta i asta komo por baha ku bòter chikí, por bai kuné den maleta di man mes. I awe dia 9 di yanüari tambe tin un di e tayernan aki ku Jeandra ta organisá huntu ku Kreaheadwraps. Si COVID permití Jeandra lo ta bèk na Kòrsou pa mas di e tayernan aki pero na Hulanda si e lo sigui organisá nan.

Pa kontakto ku Jeandra por DM e via su página di Instagram Curioustides òf tambe Curls N Flights. Tambe e tin un e-mail Jeandra.ayala@outlook.com.