WILLEMSTAD.- Djabièrnè dia 4 di yüni tabata último dia pa esnan ku kier a postulá nan mes pa keda elegí den direktiva di ABVO, por a hasi esaki. Esaki ta trese kuné ku e tres personanan ku a postulá nan mes pa presidente di ABVO a keda na tres (3). No tabatin mas kandidato ku a postulá nan mes. E tres personanan ku ta bai pa presidente di ABVO ta sra. Jinesa Martina-Hato ku ta laborá na SVB, sr. Albert Martina di grupo servisio di ABVO na prisòn i sr. George Hernandez ku aktualmente ta den direktiva di ABVO kaba. E elekshon lo ta pa e periodo di 2021 pa 2023.
Pa forma parti dje direktiva tin 11 kandidato, di akuerdo ku presidente di Komishon di Elekshon di ABVO, sr. Gerswine Hodge a duna di konosé na EXTRA. Ta di dos biaha ku sr. Hodge ta guia elekshon dje sindikato di mas grandi di Kòrsou i pais eks-Antia Hulandes.
Dia 25 di yüni próksimo ABVO ta tene elekshon pa un direktiva nobo. Un total di 4413 miembro repartí riba Kòrsou, Bonaire i St. Maarten por depositá nan voto.
Na Kòrsou lo tin 9 urna mas 2 urna mobil, na St. Maarten 2 urna i 1 urna mobil, i na Bonaire 1 urna i tambe 1 urna mobil.
Mas aleu sr. Hodge a bisa ku e biaha aki e miembronan lo vota ku pòtlot i papel, i no via di mashin manera a sosodé dia 29 di yüni 2018. Pasobra e statutonan di ABVO ta indiká ku e miembronan por vota sea ku pòtlot i papel òf pa medio di mashin.
Mirando loke a pasa na 2018, a disidí pa bai ku pòtlot i papel. Tres aña pasá, dia 29 yüni 2018 durante ku elekshon tabata tuma lugá, a surgi un desperfekto di e mashinnan di vota pa kual mester a para e elekshon i a posponé ku un siman despues. Dia 6 yüli 2018 e elekshon a tuma lugá, kaminda sr. Adrie Williams a gana e presidensia di ABVO.
E desperfekto tabata sinta den e echo ku ora vota riba sierto dje kandidatonan, otro kara tabata sali. E splikashon ta ku e pantaya tabata tarda pa “refresh” ora vota. Esei a pone ku e Komishon di Elekshon na 2018 a para e elekshon na tur e tres islanan. Pero dia 25 di yüni próksimo elekshon ta ku papel i pòtlot.