WILLEMSTAD.-Dirigentenan sindikal di ABVO, NAPB, SAP, Straf i Sitek huntu ku nan miembronan ta sintá na sede di ABVO pendiente kontesta di gobièrnu. Un ratu pasá nan a basha bai Punda i a entregá un karta na Fòrti den kua nan ta pidi Konseho di Minister pa hala aden e instrukshon pa kòrta 12,5% for di kondishonnan salarial di ámtenarnan. Gobièrnu tin te 5’or pa duna un kontesta positivo. Un kontesta negativo lo por okashoná tur sorto di situashon lógikamente.

Den kombersashon ku miembro di direktiva di ABVO George Hernandez el a splika EXTRA ku nan a bai Punda entrega e karta i nan a bai bèk e sede di ABVO. Hendenan den Punda i speshalmente komersiantenan tabata basta preokupá despues ku a tende ku ámtenarnan den akshon a sali sede di ABVO mèrdia i bai direkshon di Punda. Debí na esaki polisnan a sera entrada pa Punda pa evitá ku situashon lo por sali for di man atrobe. Komersiantenan den área di sentro di siudat ta reklamando kontinuamente ku nan tende di kualke akshon ku ta bai buska atenshon di gobièrnu debí ku ta sera Punda i esei ta stroba esun tiki benta ku nan lo por a haña.

Awe mainta tabatin hopi mas tantu ámtenar na sede di ABVO kompará ku dianan anterior. Tur kos ta indiká ku e informashon ku a sali ayera den sentido ku ministernan i parlamentarionan si a subi nan salario tabata e gota ku a pone hopi ámtenar disidí ku nan ta bai sostené e akshon di sindikatonan. (file foto)