DEN HAAG.- E miembronan di Tweede Kamer Antje Diertens (D66) i Attje Kuiken (PvdA) a dirigí un karta na sekretario di estado Raymond Knops ayera 31 di ougùstùs den kua ta pidi aklarashon riba e yudansa na paisnan Kòrsou, Aruba i Sint Maarten i tambe e Caribische Hervormingsentiteit (CHE).

Ata aki djis algun di e preguntanan di Diertens i Kuiken. E miembronan di parlamento ulandes a puntra si Knops a tuma nota kuantu malkontentu e proposishon pa e CHE i tambe kondishonnan pa fiansa a generá na Kòrsou, Aruba i Sint Maarten? Meskos nan ta puntra e opinion di Knops riba deklarashon di e Defensornan di Pueblo di Ulanda, Kòrsou i Sint Maarten, den sentido ku e tempu ku Knops a duna pa e paisnan kumpli ku e kondishonnan ta demasiado kòrtiku. Tambe ta puntra si Knops ta dispuesto na bai mesa pa deliberá kon por suavisá e periodo i si e kontesta ta negativo, dikon no!

Otro pregunta na e sekretario di estado ta si e ta kompartí e opinion ku e kondishonnan ku el a mara na e yudansa pa presupuesto ta hasi e efektonan negativo riba situashon sosial i ekonómiko ainda mas grandi i na mes momentu ta krese e desigualdat den reino. Komo tal ta puntra Knops si e ta di akuerdo pa sigui konseho di e Defensornan di Pueblo menshoná pa krea espasio pa negoshá i yega na miho desishonnan. Diertens i Kuiken ta puntra tambe e opinion di Knops riba e proporshonalidat di e lei di konsenso ku ta riba mesa, si esei ta tacha e legitimidat demokrátiko di e paisnan.

Nan ke sa si Knops ta di akuerdo ku e proposishonnan ku el a presentá lo suak e derecho di Parlamentonan di Aruba Kòrsou i Sint Maarten den bista di e instituto nobo CHE.

E miembronan Kuiken i Diertens ke sa di Knops si e por kompartí e opinion ku e situashon aktual ta pone ku mester aktua ku urgensia pa brinda yudansa na e paisnan pasobra pobresa, hamber, desempleo ta na  un nivel hopi serio den paisnan ku ta pasando momentunan ekonómiko sumamente difísil.