WILLEMSTAD.- Korte di promé instansia ayera a trata vários kaso di infrakshon di tráfiko, pero di hóbennan ku ta den milisia. Pa ku e kasonan aki Marechaussee nan hulandes tabata presente den korte pa vigilá e sala.
E hóben L. Pietersz (21) ku ta den e rango di militar tambe mester a presentá den sala di korte pa responsabilisá su mes pa su akto.
E ta keda akusá pa kore outo bou di influensia di alkohòl dia 24 di mei 2019, kore outo 3 bia sin reibeweis i kore un vehíkulo sin dokumentonan di impuesto.
Pa loke ta trata e akusashon di alkohòl, segun e prosèsverbal e dia ei tabatin un fiesta den Kazèrne, i tabatin bibida alkohóliko.
Na momento ku Pietersz a drenta outo bai su kas, e Marechaussee nan ku tabata pará na porta i a tuma nota di tur kos, a par’é i lag’é supla den e aparato. A resultá ku Pietersz a midi 450 mikrogram di alkohòl den su sistema. Normalmente lei ta permití 220 mikrogram. El a haña un but di 450 florin pa a surpasá e kantidat di alkohòl ku ta lei ta permití. A dun’é 3 chèns pa paga but, pero e no a kumpli. Esei a pone ku su kaso a bin korte pa e responsabilisá su mes pa su akto.
Pa loke ta trata e di dos akusashon e ta keda akusá di kore outo sin reibeweis .
E di 3 akusashon ku e tabata koriendo outo sin reibeweis den e periodo ku tabatin ‘lockdown’ i sin papel di impuesto. El a bisa ku su mama tabata esun ku ta hib’é trabou, pero despues ku su mama a sali na estado e no por a hib’é mas.
Pa tur e echonan aki , e akusado a bisa ku e ta atmití su fayo.
Fiskal a haña e akusashonnan probá i a demand’é na 540 florin pa kore outo bou di influensia di alkohòl, 875 florin pa kore outo 3 bia sin reibeweis i 275 florin pa kore outo sin impuesto.
Hues den su desishon a redusí e but d impuesto na 150 florin ku a suma un total di 1540 florin na but.