WILLEMSTAD.- Militarnan hulandes di e 11 Brigada Aéreo Real (‘Luchtmobiele Brigade’) for di siudat Assen ta yuda na Kòrsou ku mantenshon di medidanan kontra COVID-19. E militarnan ta bisa na prensa hulandes di RTV Drenthe ku nan ta hopi orguyoso pa nan por yuda den e lucha kontra Corona riba e isla. Manera ta konosí kada 4.5 luna Defensa ta stashoná 120 militarnan for di Hulanda riba Marine basis Parera na Kòrsou. Nan ta forma e ‘Compagnie in de West’. Na e momentu aki militarnan for di Johan Willem Friso Kazerne na Assen ta na Kòrsou.
Riba petishon di KPC (Kuerpo Polisial Kòrsou) Defensa ta duna for di djárason último èkstra sosten den mantenshon di medidanan en konekshon ku COVID. Den esaki entre otro e tin di aber ku e medidanan di plachi di dia (numbernan di outo) i e toke de keda.
Durante lunanan ku a pasa, ya Defensa tabata duna sosten militar kaba, pero esaki a keda ampliá, komo konsekuensia di e situashon serio di COVID na Kòrsou.
Outoridatnan di Kòrsou a pidi Defensa pa èkstra sosten. For di djárason tin mas Milisiano riba kaya pa duna sosten den e mantenshon di tur e medidanan di COVID. I ademas Defensa awor ta inkorporá Militarnan di ‘Compagnie in de West’. Sosten na KPC ta un forma di sosten Militar. Sosten na outoridatnan sivil ta un di e tareanan konstitushonal di Ministerio di Defensa.
Defensa a yuda na Kòrsou diferente bia kaba, pero awor ta promé bia ku e ‘Compagnie in de West’ ta duna yudansa.
Teniente (luitenant) Jesse a bisa RTV Drenthe ku e ta hopi orguyoso pa yuda. ‘E trabou ta hopi bon pa hasi. Banda di esei nos ta haña hopi reakshon positivo.’ Huntu ku su peloton e ta yudando Kuerpo Polisial Kòrsou. Nan ta yuda ku mantenshon di medidanan en konekshon ku COVID-19. ’Por ehèmpel nos ta kontrolá si hende ta tene nan mes na reglanan di toke di keda i nos ta kontrolá riba prohibishon di aglomerashon.’
Riba Marine basis Parera e militarnan hulandes ta yuda ku kontròl den e ‘kaya di vakunashon’ ku a keda instalá riba e base. E militarnan mes no ta pasa angua, pero ta kontrolá e kordinashon rondó e kaya di vakunashon.