Seguridat di ámtenarnan tin prioridat maksimo

WILLEMSTAD.-Den un karta fecha 23 di febrüari, esta awe, minister di finansa Javier Silvania ta mustra Ontvanger Alfonso Trona riba algun punto di importansia. Minister di finansa ta pone atenshon riba e situashon ku a surgi durante di último simannan, kaminda trahadónan a pone trabou abou i buska sosten di nan sindikato. E manera ku minister Silvania ta persibí esaki ta ku Ontvanger Trona no a duna sufisiente atenshon na e kehonan di su trahadónan i tambe e hefe no a asumí responsabilidat sufisiente pa pèrkurá pa un lugá sigur i saludabel pa e trahadónan por kumpli ku nan trabou. No a kontrol sufisientemente e parti di limpiesa ku tur konsekuensia ku esei a trese kuné.

E minister ta enfatisá ku ètòl no ta aseptabel di niun manera ku e seguridat na boka di trabou no ta keda garantisa. E responsabilidat pa sòru pa un lugá di traha adekuá enfátikamente ta tarea di Ontvanger.

Seguridat di ámtenarnan tin e prioridat di mas haltu. Den e kuadro ei, e minister ta sigui bisa, ku ta krusial ku Ontvanger ta tuma e akshonnan konkreto pa garantisa seguridat di trahadónan. Esaki ta enserá monitor di forma konstante e áreanan di trabou pa minimisá posibel riesgonan.

Minister Silvania ta ordená Ontvanger pa kada dos siman a manda un nota detayá di tur aktividat ku ta keda hasí pa garantisa seguridat di e trahadónan.