WILLEMSTAD.- Un minimarket i tambe vários establesimentu a haña but of a keda será debí ku nan no tabata tene nan mes na medidanan di lei di emergensia relashoná ku COVID-19. E Tim Multidisiplinario a subi kaya djaluna dia 26 di aprel i tabatin man yen pa atendé ku vários establesimentu ku ketu bai ta keda faya ku medidanan di seramentu 6’or di atardi, pero tambe di entrega kuminda.
Loke ku e tim ta konstatá ta hendenan ku ta aglomerá ketu bai dilanti di minimarketnan. E situashon aki ta trese problema pa e minimarket pasobra e Tim Multidisiplinario por sera nan of nan por haña but, pasobra ta permití hende para dilanti dje establesimentu i konsumí alkohòl.
Un minimarket na Mahumaweg a haña un but pa motibu ku nan a sera porta di establesimentu pa despistá outoridatnan, siendo tin kliente den e minimarket despues di 6’or.
Dos trùk di pan un na Siberie Winkel Centrum i otro na San Juan a risibí aviso verbal pasó nan tabata entregá kuminda na outo ku yega dilanti dje establesimentu.
Un toko na Mahuma, i otro na Dario Salasstraat tambe a risibí aviso, pasobra a laga hende keda para na e sitio. Sinembargo un minimarket riba Seru Loraweg a wòrdu será pa motibu ku despues di aviso previo, a bolbe konstatá kantidat di hende pará na e minimarket ta konsumí bebida alkohóliko. Miéntras na dos minimarket un na Jan Donker i otro na Jan Kok mester a kore ku grupo di personanan sintá dilanti e establesimentu ku ya kaba tabata será kaba.
Un bar/restorant na Semikok a risibí but pa motibu ku e no ta hasi uso di entrega na kas, pero e Tim a konstatá un biaha mas ku nan ta entregá kuminda na outo patras di e negoshi, den un forma skondí.
Djaluna tambe e tim a bai na Spuitinrichting Scherpenheuvel N.V. kaminda a para operashon di e negoshi, debí ku e no tin un eksonerashon pa ta funshoná. Meskos e tim a pasa na Kaya Kolonel Winkel i a konstatá ku konstrukshon di kas tabata den full swing. A para e trabounan pasobra nan no ta vital, i ademas nan no a pidi eksonerashon.
E Tim Multidisiplinario ta kontinuá ku kontròlnan.