Investigashon a fiha mínimo sosial pa BES

DEN HAAG.- Kada habitante di Ulanda tin derecho riba seguridat di eksistensia, un entrada sufisiente i previsibel for di kua e por kubri su gastunan básiko pa biba. E abitantenan di Boneiru, Sint Eustatius i Saba, meskos ku esnan na Ulanda, mester por kubri nan nesesidatnan di bida mas básiko sin problema. A base di esei e gabinete ulandes a komprometé su mes na 2019 pa hasi esfuerso pa yega na un mínimo sosial pa e islanan di Karibe Ulandes.

E gabinete a dal un paso importante, den direkshon pa mehora e situashon di abitantenan di e islanan ulandes den Karibe, na momentu ku a establesé un punto ku ta midi e mínimo sosial. E meta di e gabinete ta pa kombatí pobresa i drecha e kondishonnan di bida pa hinter komunidat. Pa logra esaki ta nesesario pa subi entradanan i na mes momentu mester redusí e kosto di bida na un nivel mas aseptabel. Alabes ta importante pa protehá i reforsá e potensial ekonómiko di e islanan hasiendo nan ekonomia i merkado laboral mas fuerte.

Awor mas ku nunka ku paisnan ta den krísis entre otro debí na e pandemia, ta importante pa enfatisá e balor di e seguridat di por hiba un bida digno. Corona a dal tur e islanan di Karibe ulandes hopi fuerte prinsipalmente riba tereno ekonómiko. E konsekuensianan ta diferente pa kada sektor, pero e empresanan den sektor turístiko a haña un sla forma debí na e dependensia di turismo. Ta den e kuadro ei ku e gabinete a sòru pa duna sosten finansiero na empresa pa mantenshon di kuponan di trabou, esaki a kana paralelo na e esfuersonan di e gabinete pa yega na un mínimo di eksistensia.

A base di investigashon realisá a yega na e siguiente proposishon pa loke ta trata e mínimo sosial pa 2021. Pa Boneiru a fiha un suma d $939, pa Sint Eustatius $ 1.044 i $ 1.071 pa Saba esaki ta konta pa un persona soltero sea ku e ta trahando òf no.