WILLEMSTAD.- Ayera Minister van Heydoorn a informá ku awe e tin un reunion ku Minister Cooper pa kuminsá kana e proseso pa Gobièrnu di Kòrsou por haña e tereno kaminda Sentro Pro Arte ta ubiká bèk.

Minister van Heydoorn a informá ayera tardi ku el a risibí un karta kaminda APC ta informá ku nan ta dispuesto pa entregá e tereno bèk. Mas aleu el a indiká ku tin un komishon bou di guia di sra. Lisette Sambo-Velder, direktor di Sektor di Kultura i Deporte ku a proponé dos otro sitio ku lo por kombertí den nos Teatro Nashonal.

Ta trata di e edifisio di Pòstkantor na Punda òf e sitio kaminda Fundashon Kas Popular ta situá aworakí, mirando ku den serkania tin Plasa Mundu Merced ku ta duna amplio lugá di parker.

Pa Minister van Heydoorn importante ta ku loke tabata difikultá e proseso pa por hasi uso dje tereno di Sentro Pro Arte a keda solushoná. Aworakí trabou tin ku sigui pa yega na un Teatro Nashonal.