WILLEMSTAD.- Nos minister enkargá ku ekonomia i Turismo en partikular, sr. Kenneth Gijsbertha, i tambe empleadonan di nos ofisina di turismo (CTB) tin atenshon pa e pareha aleman ku den kurso di siman pasá tabatin un mal eksperensia aki na Kòrsou. E tipo di publisidat aki sigur no ta yuda e kousa, sigur teniendo kuenta kuantu mion di komunidat ta ser invertí den turismo.

Ayera nochi EXTRA a kapta Minister Gijsbertha i tambe sr. Ritzel Godfried di CTB senando ku e pareha aki den un restorant na Otrobanda. Opviamente nos alto funshonarionan a demostrá atenshon na e pareha pa evitá ku e daño hasí lo por bira pió. No ta konosí den ki forma gobièrnu i CTB lo bai kompensá e pareha, pero a lo ménos a demonstrá atenshon.