Relashoná ku konstrukshon “hellingbaan” na Kenepa Grandi

WILLEMSTAD.-Informashon ku a yega mesa di redakshon di EXTRA ta indiká ku minister Zita Jesus-Leito a duna dos empleado públiko prohibishon di entrada na tur edifisionan di ministerio di VVRP. EXTRA a tuma kontakto ku Melvin Cijntje i el a bisa ku komo ámtenar e no por duna deklarashon riba e kaso aki, ounke Cijntje ta polítiko aktivo. EXTRA a logra ku Cijntje a konfirmá si ku el a haña e karta di minister den kua ta dun’e un “toegangontzegging”.

Pa algun siman kaba tin un konstrukshon ta tumando lugá na playa Kenepa Grandi na Banda Bou. Riba retnan sosial a kuminsá puntra kiko ta pasando i konsekuentemente a kuminsá tur klase di spekulashon. Kombiná ku e echo ku no ta duna informashon kla riba desaroyonan e kaso a bira un diskushon públiko. EXTRA por indiká ku ta trata di un konstrukshon pa fasilitá hendenan desabilitá, pues sea hendenan den rolstoel òf nos hendenan ku tin problema ku pia, rudia i lomba pa tòg nan por bai trankil i yega te na e playa. Kenepa Grandi ta rekonosé mundialmente komo un di e playanan mas bunita na mundu i praktikamente tur turista ku yega Kòrsou ke bishita e playa. Den pasado resien tin turista ku a bai purba yega playa pero e kaso a resultá unu fèrfelu pasobra e turista a ‘lora’ yega awa.

Informashon adishonal ku EXTRA a kompilá ta indiká ku ta dos ámtenar a haña e karta, esta sr. Melvin Cijntje i e funshonario Mercelia. E karta ta fechá 6 di novèmber i e motibu ku ta prohibí entrada na e dos ámtenarnan aki ta a base di nan ròl den konstrukshon ilegal di e “hellingbaan” na Kenepa Grandi. Aparentemente e minister a konkluí ku Cijntje i su kolega lo a krea e impreshon ku e proyekto ta karga aprobashon di minister. EXTRA a tuma nota ku tantu minister d turismo komo di obra públiko den prinsipio a papia positivo di e proyekto!

A disidí ku ta kuminsá un investigashon ku lo dura alrededor di 4 siman i durante di e periodo ei Cijntje i su kolega no por drenta e edifisionan. Nan mester entrega tur yabi, laptop i otro detayenan di trabou na nan hefe.