A tuma desishon tambe riba área di teknologia pa ku Refineria isla

WILLEMSTAD. -  Na okashon di lansamentu di e prenter di betòn 3-D di Janssen de Jong aki na Kòrsou, Minister enkargá ku e Ministerio di Tráfiko, Transporte i Planifikashon Urbano Sr. Cahrles Cooper a duna di konosé ku ayera Konseho di Minister tabatin un dia maratóniko, kaminda ku henter dia a reuní den Konseho di Minister i tumando desishonnan importante pa pueblo di Kòrsou.

Cooper a menshoná ku nan a papia tambe riba otro inovashonnan pa Kòrsou. Tin un grupo di kompanianan di Hulanda ku ta biniendo Kòrsou pa bin ku nan teknologia i sigui desaroyá teknologianan nobo, o sea “livinglab’, ku ta riba tereno di Refineria Isla ku no ta bai wòrdu usá pa e operador nobo ku bin.
Akinan lo bai desaroyá diferente teknologia nobo huntu ku TNO. Pues Kòrsou ta uni forsa ku TNO pa bin ku diferente teknologia.

Cooper a menshoná ku gobièrnu ta kontentu ku lansamentu di  un teknologia nobo na Kòrsou pa ku konstrukshon di kas.

Un otro desaroyo riba tereno di teknologia ta ku otro siman,  lo inougurá e promé “smart bus stop” ku ta keda dilanti di Radulphus, ku ta un produkto lokal i ku e pensamentu pa ora ku kaba si saka su problemanan chikí, esaki lo keda eksportá pa mundu.

Aki Kòrsou mester bai i Kòrsou tin di bira e modelo na mundu Cooper ta enfatisá.