Kòntròlnan interno di SOAB lo kontinuá i intensifiká

WILLEMSTAD.-Charles Cooper komo minister di finansa interino a emití un informe den kua e ta duna splikashon di e proseso ku e aktual minister di Finansa Javier Silvania a inisiá òf a kontinuá kuné den kuadro di e reorganisashon den hinter e servisio di impuesto. Minister Cooper ta mustra ku e rapòrtnan di SOAB, komo e akountent di gobièrnu, no tabata dirigí riba niun persona  spesífiko na Ontvanger. SOAB a kontrolá e proseso di kobransa di impuesto i aplikashon korekto di e polítika di kobransa.

Manera indiká ta minister Cooper komo minister di finansa interino a emití un komunikado di prensa pa splika e situashon despues ku Kòrsou a tuma nota ku asta lidernan di koalishon respektivamente Gilmar Pisas i Ruthmilda Larmonie-Cecilia a bai papia ku Ontvanger di Kòrsou na su ofisina. Tur esaki a tuma lugá despues di publikashon di kontenido di rapòrt di SOAB riba Ontvanger i su organisashon.

Algun di e trayektonan ku minister Silvania a inisiá òf a kontinuá kuné tabata un Ontvanger “sin kèsh”, introdukshon di un departamento di servisio na kliente ku un callcenter, i implementashon i publikashon di un polítika transparente di kobransa. E minister di Finansa a pidi SOAB pa periódikamente kontrolá e aplikashon korekto di e polítika di kobransa. Cooper ta enfatisá ku SOAB no a hasi niun investigashon riba niun persona spesífiko den Ontvanger, pues e investigashonnan di SOAB no tabata dirigí riba e akshonnan òf negligensia di un persona spesífiko na Ontvanger.

Despues di nan investigashon SOAB a raportá lokual nan a konstatá i su rekomendashonnan.

SOAB no a hasi un asina yamá “controleonderzoek” (investigashon di kòntròl). Konsekuensia di esaki ta ku SOAB no por inkluí konklushonnan den su rapòrtnan. Sinembargo, lokual ku SOAB a konstatá i raportá ta di tal índole ku esakinan a kondusí na un kantidat di akshonnan di mehoransa, entre nan:

• 
  

• E desishon di e hefe di Ontvanger ku no lo paga adelanto (voorschotten) mas. E desishon aki a drenta na vigor 1 di yanüari 2024;

• 
  

• E desishon ku inmediatamente un plan di mehoransa mester keda prepará i implementá pa asina mitigá e riesgonan ku SOAB a señalá. SOAB lo evaluá e plan di mehoransa, monitoriá e implementashon, i raportá tokante esaki;

• 
  

• E desishon ku kualkier adelanto ku ainda no a keda kanselá, mester pagá lo mas pronto posibel;

• 
  

• E desishon ku den tur archivo (‘dossier’) di debenan di impuesto mester tin e dokumentashon nesesario (inkluso e hustifikashon di akuerdonan di pago);

• 
  

• E desishon ku e kòntròlnan interno di SOAB lo kontinuá i intensifiká;

• 
  

• E desishon ku mester bin un sentro di notifikashon (‘meldpunt’) pa kontribuyentenan (personanan ku ta paga impuesto);

• 
  

• E desishon ku mester bin un kampaña di informashon pa informá komunidat tokante e polítika i guia di kobransa pa asina tur hende ta na altura di nan derecho i debernan.

• 
  

E akshonnan di mehoransa menshoná tin komo meta pa mitigá e riesgonan ku SOAB a señalá i pa optimalisá e funshonamentu di Ontvanger. Nos ta sigui traha riba mehoransa di nos servisio di impuesto (Inspekshon i Ontvanger) a fin di ofresé un servisio transparente i amigabel na nos pueblo.