A rekordá Martha kon el a “lobby” pisá pafó di Head Hunting Team

WILLEMSTAD.- Ayera minister Charles Cooper riba su página di Facebook a kontestá e atake ku GIK/Rutsel Martha a lansa den su kontra i tambe promé minister sr. Gilmar Pisas relashoná ku apertura di refineria.

Minister Cooper a bisa lo siguiente: “Grandinan sa bisa: Den Kuaresma diabelnan ta lòs, òf den kuaresma algun hende ta mira spiritu. Esaki ta pas netamente pa GIK (sr. R. Martha) su karta ku el a skirbi manda rònt mundu pa purba tacha nòmber di miembronan di e gobièrnu aki en general i minister presidente Pisas i mi persona en partikular. Dor di menshoná ku supuestamente nos lo a influensiá e proseso. Nunka mi no tabata sá ku mi tin tantu poder asina pa influensiá tantu Raad van Minister (RvM) komo Raad van Commisaris di Refineria di Kòrsou (RdK).  Pues, esaki ta un mentira flagrante di parti sr. Martha, ku durante di e proseso GIK a purba “lobby” di tur manera serka nos i serka algun miembro di hunta di komisario di RdK. Nos a keda leu. Pasobra nos ta separá amistat for di interes general di pais.

Mi kier djis refreská su memoria di reunionnan tené den un restorant den área di Dominguito i tambe na kas di un prominente èks-polítiko den parti pariba di Kòrsou, ku entre otro algun èks-miembro di hunta di komisario di RdK. Dia Ministerio Públiko manda yama mi, mi lo bai den mas detaye di esaki. Si ta nesesario. Echo ta ku gabinete Pisas a tene su mes masha leu for di e proseso di buska un operador pa nos refineria. P’esei riba proposishon di RdK a bai di akuerdo pa lanta un “Head Hunting Team” pa guia un proseso limpi i transparente. I nos tur, RvM i RdK, a bai di akuerdo ku lo respetá e lokual ku “Headhunting Team” bini kuné komo resultado for di nan análisis, ken lo ta e “preffered bidder” pa sigui negoshá kuné. Grandi tabata nos sorpresa ora ku dos miembro di hunta di komisario, sin ningun base, kier a bòikòt e resultado di e “Head Hunting Team”, i pusha GIK dilanti. Probablemente komo fruta di e reunion sekretu tené na un kas di un èks-polítiko pariba di Kòrsou di lòbimentu ku ma menshoná anteriormente. No papia mes di e sosio brasilero den GiK kual tambe sr. Martha a purba “lobby” pa e haña oudiensia serka nos gobièrnu. Nos a ninga esaki rotundamente. Te awe CORC ta warda nan bini ku sèn. Finalmente ora bo lesa e karta aki di sr. Martha, ta parse ku e mes tabata sintá den e “Head Hunting Team” anto. Pfffff……..

Sr. Martha mester komprondé den un proseso limpi di buska operador nobo pa Refineria Isla, nan a pèrdè. Anto nan tur a firma ku no tin kuenta di number 2 ku number 3 ta bini na bùrt. Un sugerensia na sr. Martha i GIK: Ta un bon pèrdèdó”, te aki e reakshon di Cooper...