WILLEMSTAD. - Djasabra 16 di aprel último, Minister di Enseñansa, Siensia, Kultura i Deporte (ESKD) demisionario, Steven Croes, a hasi un bishita na hospital Dr. Horacio Oduber, relashoná ku e 9 pashèntnan afektá pa COVID-19 ku a keda interná den e hospital aki na Aruba.

Ounke no tabata trata di un bishita ofisial di Minister Croes na Aruba, el a traha tempu pa bishitá e pashèntnan aki. Durante e bishita Minister Croes a logra di papia ku algun pashènt afektá pa COVID-19, kende a ekspresá nan apresio grandi pa e echo ku Minister Croes a pasa wak kon ta bayendo ku nan.

E gerente médiko, ku tambe a apresiá e bishita mashá, a duna Minister Croes un rekorido kompleto den e hospital. Minister Croes a keda hopi impreshoná pa e bon organisashon den e hospital.

Minister Croes a sera konosí alabes ku e ‘Raad van Bestuur’ di e hospital, ku tambe tabata hopi kontentu ku e bishita. Minister Croes a gradisí profundamente e gerente i tur personal pa tur loke nan ta hasiendo pa nos pashèntnan. Prinsipalmente mirando ku hospital Dr. Horacio Oduber a para vários di nan kuido regular pa asina nan por a risibí e pashèntnan di Kòrsou.

Minister Steven Croes a hasi un bishita di kortesia tambe serka Promé Minister Evelyn Wever-Croes, kaminda el a gradisí gobièrnu i pueblo di Aruba pa a risibí i kuida nos pashèntnan afektá pa COVID-19.

Minister Croes tambe a enfatisá na Promé Minister Wever-Croes ku Kòrsou semper lo ta dispuesto pa yuda hermana isla Aruba ora nan mester di nos ayudo.