WILLEMSTAD.- Promé Minister Eugene Rhuggenaath a biaha pa St. Maarten pa asistí na e Konsulta di Relashonnan Eksterior di Reino 2019. E Konsulta di Relashonnan Eksterior di Reino ta un konsulta ku ta tuma lugá anualmente i ku ta fungi komo base pa yega na resultado di tareanan ku tin di aber ku e maneho di eksterior di Reino Ulandes.

Na e konsulta ta partisipá e Promé Ministernan di Aruba, Kòrsou i St. Maarten i e Minister di Asuntunan Eksterior, ku ta pone ku tur kuater pais ta haña e oportunidat pa atendé nan interesnan i huntu yega na sinkronisashon. E kombenionan di trabou ku ta palabrá durante di e konsulta ta duna klaridat riba e focus sinkronitativo pa loke ta e esfuersonan den kuadro di relashonnan eksterior.

Riba agènda tin e aña akí entre otro e focus geográfiko, siguridat i situashon ku Venezuela mirando e desaroyonan di último tempu. Banda di esei ta pone atenshon na determinashon di e ròl di Reino pa loke ta e problemátiko di Venezuela. Ademas lo para ketu na e interesnan di Union Oropeo relashoná ku posishon di e LGO - nan i presidensia di OCTA. Por último, pero no ménos importante, lo toka e tema tokante kolaborashon regional kaminda ta elaborá riba miembresia di organisashonnan regional karibense ku e paisnan ta aspirá pa forma parti di dje.

Pa Kòrsou e Konsulta di Relashonnan Eksterior di Reino ta duna espasio pa promové e kolaborashon i sinkronisashon ku partnernan di Reino. Aparte di esei Gobièrnu di Kòrsou ta haña mihó noshon di e temanan ku ta di importansia pa e otro paisnan den Reino. Durante di e konsulta Promé Minister di Kòrsou lo hasi uso tambe di e oportunidat pa hiba kombersashonnan bilateral i trilateral ku representantenan di e otro paisnan den Reino. Na final di e Konsulta di Relashonnan di Eksterior ta tuma lugá un konferensia di prensa kaminda tur pais lo wak bèk riba e diferente akuerdonan ku a hasi, ku e meta pa komuniká esaki na komunidat.

Promé Minister Rhuggenaath a regresá Kòrsou ayera mes huntu ku Minister di Asuntunan Eksterior, sr. Stef Blok, pa asina por kontinuá nan kombersashonnan bilateral awe 30 di aprel.