WILLEMSTAD.-Un ratu pasa a drenta un informe ofisial di parti di minister di Salubridat Dorothy Pietersz-Janga den kua e ta konfirmá informashon ku tabata sirkulá for di tempran den tal direkshon. E minister ta indiká ku riba 31 di dezèmber último, el a tèst positivo pa COVID-19. Huntu ku su tim el a tuma e medidanan di prekoushon nesesario i a kumpli ku tur e protokòlnan stipulá pa gobièrnu.

E mandatario ta den isolashon na e momentunan aki i e ta informa ku su estado di salú ta stabil mirando ku e ta rekuperando tiki tiki pero sigur. ‘Hasiendo uso di e oportunidat aki mi ta supliká un i tur pa sigui kumpli ku tur e reglanan vigente i pa keda kas si esaki ta permití. Kuida esnan rondó di bo dor di kuida bo mes, asina nos por evitá ku e vírùs lo sigui plama. Un danki ta bai na tur ku a manda mensahenan di pronto rekuperashon i ku tabata preokupá pa mi estado di salú. Na momento ku mi ta permití pa sali for di isolashon,lo mi informá esaki debidamente.