WILLEMSTAD.- Na e momentunan aki Parlamento di Kòrsou ta reuniendo, tratando puntonan di hopi importansia. Riba e djadumingu aki pues Parlamento di Kòrsou ta den un reunion públiko pa trata e presupuesto supletorio di 2018. Minister di finansa Kenneth Gijsbertha a kaba di informá  Parlamento ku gobièrnu a risibí e parti di plaka di BRK (belastingregeling Koninkrijk) ku ta alrededor di 15 mion. E minister a sigui bisa ku no ta premirá ku ta bini medida.

Kòrsou ta sigui partido di futbòl entre Kroasia i Dinamarka ku te ainda skor di 1-1. Minister Gijsbertha ta keda enfatisá ku mientrastantu gobièrnu ta keda hasi lo máksimo pa haña plakanan ku ta riba kaya, e aki ta bisa ku mirando e situashon ekonómiko no ta duna espasio pa bin ku mas medida riba nos hendenan. Esei e gobièrnu aki lo keda mantené te na último momentu. Segun e minister, tin hopi hende ta manera kos ta pidi pa medida, pero gobièrnu promé ku yega einan ta trata na kòrta kaminda por tin vèt ainda.

Ta yega na areglo ku e kompania òf hendenan ku tin debe na gobièrnu, pero ta evitá di kita propiedat di gobièrnu hende. E sistema di kobransa ku e gobièrnu aki ta praktiká ta unu sosial, ta stimulá pa paga pa hendenan komprondé nan responsabilidat. Tin algun kompania ku instansianan a duna nan hopi areglo kaba, i lo yega kaminda ku no tin manera di hasi.

Gasolin

Parlamentario Cooper a puntra si por hasi algu pa suavisá preis di gasolin. Minister Gijsbertha a bisa ku Cooper ta bini di mesun empresa kuné (red. Refineria Isla). E minister a splika ku a akordá e sistema kaminda e reguladó ta chek preisnan pa asina duna na komunidat e preisnan basá riba loke tin riba merkado. E minister a bisa ku gobièrnu a tene kuenta ku loke doñonan di pòmp a pidi pa hopi aña kaba i komo tal a tene kuenta ku esei tambe den e oumentu ku ta drenta na vigor awor aki.