WILLEMSTAD.- Kasi 7’or anochi awe djadumingu i ainda Parlamento di Kòrsou ta reuní pa diskutí riba presupuesto supletorio 2018. Tin vários hende i parlamentario ku a ekspresá preokupashon den direkshon di gobièrnu pa hasi un esfuerso pa kobra èkstra impuesto na tur esnan ku ta manda sèn afó. Den e kaso aki por pensa den direkshon di e kantidat di ekstranheronan ku tur luna ta manda hopi plaka pa nan famia via di e diferente sistemanan. Minister di finansa Kenneth Gijsbertha ta splika ku e konseho ku el a haña di Banko Sentral ta negativo. Net promé ku 7’or bati e reunion a kaba despues di votashon.

Parlamento di Kòrsou ta atendiendo e presupuesto supletorio awe djadumingu riba bispu di selebrashon di Dia di Bandera. Tin pregunta di parlamentarionan ku a puntra si tin espasio ku Kòrsou lo por fia plaka riba merkado pa realisá plannan. Riba esaki e titular di finansa a duna di konosé ku e debe aktual di gobièrnu ta 2.3 miar i segun e norma di interes Kòrsou por fia ainda alrededor di 3 miar. E minister a bisa ku e no ta kere ku ta algu sabí pa bai subi debenan te 5.5 miar.

Rekargo èkstra

Pa loke ta trata e proposishon pa kobra sierto porsentahe èkstra riba plaka ku ta bai den eksterior minister Gijsbertha a duna di konosé ku ya abo ta asina ku riba tur transakshon finansiero ta kobra ‘license fee’. Ta den e kuadro ei ku Banko Sentral den su konseho na gobièrnu ta haña ku no ta korekto pa implementá mas rekargo riba esnan ku ta saka sèn afó. Segun Banko Sentral, tal desishon lo ta deskriminatorio. Niun kaminda na mundu, ku eksepshon di Turkia, no ta hasié. E minister a bisa ku el a puntra Banko Sentral pasobra tin hopi hende ta kere ku esei lo por yuda.

Tin un schommelfonds ku ta atende fondonan sosial, ku ta kai bou di Banko di Seguro Sosial, SVB. Riba esaki minister Gijsbertha ta bisa ku gobièrnu no ta saka niun depchi for di schommelfonds. Den kaso ku resultá ku e fondonan tin défisit gobièrnu tin obligashon pa pone fondo adishonal, pero den kaso ku e fondonan tin surplus esei ta sirbi e fondonan pa e siguiente aña ya asina gobièrnu lo mester pone ménos sèn aserka. Den kaso di 2017 ta asina ku e schommelfonds tabatin un resultado positivo di 35 mion den 2017. Esaki ta nifiká ku pa e siguiente ano gobièrnu mester pone ménos sèn.

Otro proposishon ta pa gobièrnu kobra 1 dòler riba kada barí di zeta ku keda produsí aki. Minister Gijsbertha a bisa ku esaki no ta nesesario. Den pasado ku e tabata traha den Shell e ta kòrda ku a trata algu asina pero Shell a bai korte i a gana. E punto ta ku no por bini ku algu asina mei mei di fiesta. Ta pa esun ku bin kuminsá operá e kompania di nobo lo por traha un akuerdo ku ta enserá e proposishon di kobra 1 dòler riba kada barí di zeta.

Debe astronómiko

Minister di finansa a informá Parlamento ku na Kòrsou tin kompanianan ku tin debe astronómiko na gobièrnu. E mandatario a sigui ripitié ku e echo ku e kompanianan tin debe sumamente grandi na gobièrnu. Asta a kuminsá pensa pa gobièrnu tuma e maneho dje kompanianan ei, mantené e operashon pa evitá ku hendenan ta pèrdè trabou i kaba ta buska otro operador pa e kompanianan aki.

Finalmente Parlamento a aprobá e presupuesto supletorio ku 11 voto pro i 5 kontra.