WILLEMSTAD.- Minister di finansa Kenneth Gijsbertha ta na Ulanda huntu ku ministernan Suzy Camelia-Römer i premier Eugene Rhuggenaath. Den ousensia di e titular di finansa a kuminsá sirkulá un informashon indikando ku bastante persona lo pèrdè trabou den Belasting Accountants Bureau ku ta BAB. Minister Gijsbertha a informá EXTRA ku el a tuma nota di e informashon ku ta sirkulando, pero na momentu ku e ta bek na Kòrsou e mes lo atendé ku e asuntu ei na BAB.

Informashon adishonal ku EXTRA a logra kompilá ta indiká ku aparentemente e minister lo no ke sigui duna e supsidio nesesario na fundashon BAB. Nos ta keda pendiente loke e minister ta bai splika riba e partikularidat aki.

E informashon ku ta sirkulando ta bisa ku supuestamente na BAB tambe lo tin retiro masal. Parse ta trata di e trahadónan ku ta kontrolá negoshinan pa wak si nan ta usando e kahanan di BAB ta esnan ku lo a haña tende ku no tin mester di nan servisio mas. Ta e mesun empleadonan aki tambe lo ta esnan ku ta kobra hende ku tin belasting atrasá.

E informashon ta bisa ku lo no tin trabou pa e grupo aki entrante prome di yüli. Manera indiká, minister Gijsbertha tabata den reunion na Ulanda i no por a bai den detaye pa konfirmá òf desmentí, pero el a bisa si ku ora e ta bek e mes ta bai atendé e situashon na BAB.