Bakuná òf no tur hende mester kuida!

WILLEMSTAD.-Minister enkargá ku Salubridat, Medio Ambiente i Naturalesa sra. Dorothy Pietersz-Janga de enkuentro ku prensa a indiká ku for di promé di ougustus último te awor, e i su tim di e ministerio di GMN ta reuní tur dia ku e tim di krísis. Den reunion ku ministernan di otro paisnan den Reino a trata e asuntu di posibel interkambio di personal pero einan el a komprondé ku Aruba i Sint Maarten tin mesun problema ku Kòrsou, esta ku no tin sufisiente personal den kuido. Minister Pietersz-Janga a duna di konosé ku e situashon den hospital ta serio ya ku tin 38 persona hospitalisá ku Covid. Kada trahadó den kuido intensivo mester atendé 4 pashènt di Covid pues no tin garantia ku e trahadónan ei por duna kuido optimal na e pashèntnan.

Manera ta konosí Curaçao Medical Center a duna di konosé ku nan tin mester ku hopi urgensia, di personal spesialisá. Ta den e kuadro ei ku CMC ta keda sklama pa tuma medidanan pa evitá ku mas hende ta sigui drenta hospital. E minister ta bisa ku awe atrobe el a reuní ku e trahadónan di kuido intensivo i splika nan ku e a komprondé nan situashon pero e no ke hasi polítika ku malesa di hende. Mester analisá bon promé ku tuma desishon.

Minister Pietersz-Janga ta kere ku e manera pa prevení ta si tur hende sòru pa nan ta bakuná. ‘Ta nos tur mester kuida, evitá aglomerashon, tene distansia, usa tapaboka, laba man etc. Kontal mester prevení. Si awor aki yen hende a resultá malu ku Covid tur hende ta komprondé ku esei ta resultado di e fiestanan ku a tuma lugá resientemente. E fiestanan ei a sòru pa hopi kontagio. P’esei bakuna òf no, tur hende mester kuida”, asina minister di GMN a bisa. Mas detaye den edishon di EXTRA.