WILLEMSTAD.-Minister Javier Silvania enkargá tambe ku Salubridat, Medio Ambiente ta informa ku riba djamars 28 di mei, a tuma lugá e promé reunion ku interesadonan di e problemátika di Dam Pretu. Ademas di e miembronan di e grupo di trabou, tabata presente representantenan di e abitantenan den besindario, doñonan di trùknan i kultivadónan di bèrdura i hortikultornan. Durante e reunion aki, esnan presente a referí un biaha mas na e importansia di un maneho efisiente i efektivo di Selikor pa kombatí tiramentu ilegal di sushi. E grupo di trabou a indiká ku por atendé e problemátika aki solamente si tuma medidanan konkreto, di un banda, relashoná ku maneho di sushi i, di otro banda, dor di aplikashon efektivo di e maneho. E grupo di trabou a diskutí un seri di proposishonnan konkreto ku esnan presente. Seguidamente, Minister di Salubridat Públiko, Medio Ambiente i Naturalesa (“GMN”) lo presentá e proposishonnan aki na Konseho di Ministernan.

E proposishonnan aki ta enfoká prinsipalmente riba optimalisashon di e maneho di sushi. Pa redusí e molèster di inmediato, Minister di GMN ta proponé pa (i) habri e trasbordadónan di sushi di Selikor grátis pa tur hende durante dos luna i (ii) adaptá e sistema di traha pa redusí e tempu di espera. Durante e periodo aki, lo tuma mas medida konkreto di término kòrtiku i largu pa kombatí tiramentu di sushi ilegal i optimalisá e maneho di sushi na Kòrsou. E periodo di dos luna aki lo fungi tambe komo periodo di prueba. Mas detaye den edishon di EXTRA.