WILLEMSTAD.- Minister di Hustisia di Hulanda, Ferd Grapperhaus, a pidi pa un investigashon na e kantidat di antiano i arubianonan ku ta aktivo den kriminalidat na Hulanda. Porsentahe ta subiendo pa basta tempu kaba. Asina Grapperhaus a skirbi den un karta pa parlamento hulandes. Segun e minister tin un desaroyo basta remarkabel na Hulanda. Na un banda sifranan di kriminalidat na Hulanda den general a baha pa mas ku 15 aña largu. Pero ora ta trata hóbennan i adultonan di desendensia di islanan di Antia i Aruba, i tambe Sürnam, Turkia i Maroko e porsentahe ta sigui. Grapperhaus ke hasi un investigashon profundo dor di sentro pa investigashon i dokumentashon sientífiko (WODC) na Hulanda. Tambe, segun Grapperhaus, ta remarkabel ku Antianonan i Arubanonan ta representá asina hopi den e statistiknan ora ta trata kondena i detenshon. WODC tin ku investigá kiko ta e motibu di esaki. I tambe Grapperhaus ke sa si ta asina ku hende for di Antia i Aruba ta wòrdu di kondená ku mas frekuensia i tambe ta keda sera pa mas aña kompará ku otro hende.
Ku e resultadonan Grapperhaus ke traha riba un maneho pa evitá ku hóbennan i adulto di islanan di Antia i Aruba, i tambe Sürnam, Turkia i Maroko ta keda enbolbí den kriminalidat. Ku e karta Grapperhaus a reakshoná riba preguntanan ku parlamentario pa partido SGP Kees van der Staaij a hasi tokante e tópiko.