WILLEMSTAD.- Djárason último riba proposishon di minister di hustisia sr. Shalten Hato konseho di minister a bai di akuerdo pa bini ku e dekreto ministerial, p’asina duna espasio na
artistanan internashonal ku ta inkluí yu’i di Kòrsou artista biba afó, pa bin presentá na Kòrsou den e periodo di 1e desèmber te ku djárason di shinishi.
Minister Hato a bisa EXTRA ku el a hasi esaki hasiendo uso di artíkulo 47 insiso 2 di e Landsverordering di Openbare Orde ku ta dun’é e posibilidat pa bini ku e dekreto ministerial.
Pues e artistanan por tei for di tur fiesta kuminsando for di den luna di desèmber i tambe aktividatnan di karnaval.
Konseho di minister a bai di akuerdo pa minister Hato tuma konseho na ministerio di finansa, SOAW i su propio ministerio p’asina e por bai over na saka e dekreto ministerial a base artíkulo 47 insiso 2, via di Departamentu di Pèrmit di KPC, artistanan estranhero den e periodo di 1e desèmber te ku djárason di shinishi por presentá na Kòrsou. Tambe konseho di minister a bai di akuerdo pa minister Hato sinta ku stakeholder nan, bou di kual A.M.A.K. i tambe promotornan, p’asina nan por duna nan punto di bista riba su proposishon.
Minister Hato a motivá su desishon dor di covid, indikando ku pais ainda ta den situashon ekonómiko difísil. I pa aportá na kresementu ekonómiko i duna aporte na esnan ku ta kome for di e mundu di farándula, a hasi uso di artíkulo 47 insiso 2. Esaki den konkordansia ku e metanan di e agènda 2030 di e metanan di Nashonnan Uní pa loke ta trata desaroyo duradero, ku tambe ta parti di e programa di gobernashon di gabinete Pisas. Kòrsou ta para netamente pa e seis metanan di desaroyonan duradero, entre nan un kresementu ekonómiko, i trabou hustu.
Finalmente minister Hato a rekordá riba algun punto ku tin den artíkulo 47 insiso 1 ku ta indiká ku ningun artista estranhero no por presentá na Kòrsou sin un pèrmit di evento di minister di hustisia. Artíkulo 47 insiso 1 mes ta indiká ku artista estranhero ta un persona ku no ta un abitante di Kòrsou, pues e lei no ta papia di nashonalidat.