DEN HAAG.- Minister di enseñansa, kultura i siensia hulandes sra. Ingrid van Engelshoven ta trahando riba un rapòrt tokante studiantenan ku ta sali for di Kòrsou, Bonaire i St. Maarten pa Hulanda i no ta terminá nan estudio.
Sra. van Engelshoven a duna di konosé na Tweede Kamer ku dia 15 desèmber 2020 el a haña e rapòrt di investigashon di Ombudsman ku ta titulá “Kopzorgen van Caribische studenten” ku e fundashon WeConnect a traha. Den kuadro di e investigashon aki, i riba invitashon di Ombudsman Nashonal, e minister a bisa ku dia 10 desèmber 2020 e tabata den kombersashon ku Ombudsman Nashonal, pero tambe algun studiante ku a konta di nan eksperensia komo studiantenan ku start nan estudio na Hulanda.
Mas aleu e minister a bisa ku aktualmente den palabrashon ku sekretario di estado sr. Knops, sekretario di estado di salubridat, bienestar i deporte, e ta trahando riba un karta pa entregá Ombudsman Nashonal komo reakshon riba e rapòrt ariba menshoná. Huntu ku esaki tambe e lo informá Tweede Kamer pa medio di un karta tokante di e diferente investigashonnan resientemente relashoná ku studiantenan ku ta bini for di skol sekundario di e partinan di islanan di Karibe Hulandes. Ademas lo señalá e puntonan di atenshon di e studiantenan di Karibe i e direkshon di solushon ku e fundashon WeConnect a bin kuné.
Den su rapòrt, Ombudsman Nashonal ta señalá entre otro fragmentashon den provishon di informashon na e studiantenan aki.
Ombudsman Nashonal ta indiká ku e tin e nesesidat na tempu i adekuá pa duna informashon riba vários tereno meskos ku tin nesesidat mas dirigí riba guia na momentu ku e studiante yega Hulanda i durante di su estudio. E liña di provishon di informashon, tur e aktividatnan di preparashon i guia ta forma parti di un atendementu mas integral ku e minister lo atendé huntu ku su koleganan minister di enseñansa di Aruba, Kòrsou i St. Maarten.
Mas aleu e minister hulandes di enseñansa a sigui bisa ku aktualmente e ta trahando e rapòrt den kolaborashon ku tur e partidonan envolví.
WeConnect ta un dje partidonan ku pa algun aña kaba ta duna un kontribushon balioso di e traspaso di Karibe pa e parti di Oropa di Reino.
E ministernan di BZK, SZW, EZK i OCW lo sostené e aktividatnan di non-profit di e fundashon WeConnect ku un kontribushon anual i tambe ku e kolaboradornan di e fundashon kontinuamente lo tuma lugá kombersashonnan tokante di nan aktividatnan relashoná ku e puntonan di atenshon aktual i deseo dje desaroyo di maneho.
E loke ku WeConnect ta ofresé manera otro partidonan ku ta desaroyá aktividatnan manera informashon, formashon i guia di studiante, lo tin un aserkamentu integral, e minister di enseñansa, kultura i siensia a splika finalmente.