WILLEMSTAD.- Minister di Finansa Javier Silvania a kontratá dos hende ku ta bai hasi un trabou hopi importante pa minister. Asina Silvania a bisa djamars último durante entrevista ku EXTRA. Segun Silvania lo ta manera dos ‘pitbull’ ta bai traha pe. E promé ta Caryl Monte pa e ta bai yuda baha gastu den salubridat. Segun Silvania e tin sosten di Kolegio Supervishon Finansiero (Cft) pa esaki. Pa motibu ku Cft a rekomendá pa implementá e konsehonan ku sr. Monte a duna den su rapòrt tokante salubridat na Kòrsou. Silvania ta na altura ku e ta bai trapa riba ‘lange tenen’ (dede di pai largu) den mundu di salubridat na Kòrsou. Pero segun Silvania gastunan den salubridat ta hopi haltu i nos tin ku hasi algu. E gastunan awor ta fo’i balansa, segun Silvania. ‘Mi ta anunsiá ku e gobièrnu aktual lo kuminsá baha gastu, a base di konseho di Caryl Monte. “Djis pa tur hende ta na altura”, minister di Finansa a bisa.

Manera ta konosí gobièrnu anterior a instalá un komishon di Reforma Finansiero den salubridat, bou di guia di Caryl Monte. Basá riba konseho di e komishon gobièrnu a disidí pa baha gastunan den sektor di salubridat riba tres tereno; ku ta gastunan di spesialista, gastunan pa tratamentu médiko den eksterior i gastunan di remedi. Segun Cft, i tambe Silvania, e bahamentu di gastunan te ainda no ta sufisiente. Komo presidente di e Komishon di Reforma Finansiero Caryl Monte a indiká kaba ku gobièrnu mester bini ku proposishon di leinan pa asina por kuminsá ku e reformanan. Tambe Monte a bin ku proposishon ku konsumidó mester stòp di usa remedi di marka ku ta mas karu i kuminsá usa remedi genériko ku ta mas barata.

Banda di esei Silvania a duna di konosé ku el a kontratá un akountent ku ta bai Ontvanger ‘pa nos ta bai kobra e debenan ku ta riba kaya. Nos no ta bai kore ku hende pober òf hende bashí. Pero nos ta bai na unda tin ‘vet’. Einan nos tin ku bai.’ Segun minister mag pone beslag riba outonan luhoso. Pero no pone beslag riba outo ku ta duna hòmber chikitu un salario. ‘Nos ta bai kobra sèn ku ta riba kaya, pero e kos mester ta den balansa’, Silvania a bisa. ‘Mi tin lomba kontra muraya relashoná ku nos situashon finansiero, pero mi no ta desesperá. Mi tin un plan kon mi por sòru pa pone presupuesto di Kòrsou den balansa. Pa yega na esei, mi tin ku subi entrada i baha gastu.’ E ta enfatisá ku esaki ta trabou di minister di Finansa. ‘Mi ta dispuesto pa hasi esaki. Mi sa ku lo tin hopi kritiká riba mi maneho. No ta problema. Mi por. Pasobra si bo no por e kayente, bo tin ku sali for di kushina.’