DEN HAAG/

WILLEMSTAD.- Miéntras ku resientemente e servisio di gobièrnu Kranshi a introdusí e sistema nobo ku no ta aseptá pago ku plaka kèsh pa niun di e servisionan ku nan ta brinda, na Ulanda minister Kajsa Ollengren a manda karta na 380 munisipio den kua e ta splika ku no ta posibel ku un siudadano ta yega na bali di un munisipio pa haña servisio i ta eksigí di dje ku e mester paga ku su karchi di banko so. E minister ulandes a enfatisá ku lei ulandes ta determiná ku no por eksigí ku mester paga dor di swaip so.

Vários munisipio a introdusí e eksigensia ku por paga solamente pa medio di swaip. Na Ulanda tambe a duna komo e motibu prinsipal e seguridat di e trahadónan. Minister Ollongren ta bisa ku simplemente e kos ei no por. E siudadano mester tin e derecho pa paga ku tur tipo di instrumento di pago legal. Korte oropeo tambe a atendé ku e asuntu i a indiká ku pago ku plaka kèsh mester keda posibel.

Organisashon di grandinan den un reakshon a duna di konosé ku nan si ta masha kontentu ku e reakshon di minister Ollengren pasobra hopi di nan miembronan,esta grandinan tin basta problema pa atendé ku e karchi di banko. Ta bini aserka ku hendenan ku ta parti di un programa speshal pa evitá ku nan ta hinka nan kurpa ku demasiado debe, no tin un karchi di banko, e pregunta ta kiko ta bai hasi pa sigui yuda e hendenan aki.

Na Kòrsou Kranshi ta indiká ku nan a kana un proseso di preparashon largu i finalmente a implementá e desishon ku no ta aseptá pago kèsh pa niun servisio. Sea mester swaip òf hasi e pago na banko prome ku bai Kranshi. gobièrnu di Kòrsou lo sigui e desaroyonan manera ta e kaso na Ulanda òf no?