WILLEMSTAD.- Ministerio di Salubridat, Medio Ambiente i Naturalesa pa 4 aña konsekutivo ta sostené e akshon di limpiesa mundialmente, esta “World Cleanup Day”. Aki na Kòrsou e ta keda kordiná pa Curaçao Clean Up.

Ayera e organisashon a bishita minister di Salubridat, Medio Ambiente i Naturalesa, sra. Dorothy Pietersz-Janga pa entreg’é un foyeto dje akshon grandi ku ta tuma lugá dia 18 di sèptèmber próksimo. Den e akshon mundial aki, Kòrsou huntu ku 118 pais rònt mundu ta tene akshon di limpiesa grandi.

Minister di Salubridat, Medio Ambiente i Naturalesa, sra. Dorothy Pietersz-Janga a duna di konosé ku: “Nos mes ta maltratá nos pais”. Nos pais ta dushi i bunita, sinembargo mester realisá ku nos tin un situashon amargo pasobra na vários sitio ta tira sushi, roinan tambe ta yena ku porkeria. Meskos ku mondinan a bira sitio ta dùmp shushi, i asina ta daña nos medio ambiente.

E titular di medio ambiente a bisa ku ta hasi doló pa mira ku nos mes ta maltratá nos dushi pais.

P’esei dia 18 di sèptèmber próksimo, e mandatario ta hasi yamada na pueblo di Kòrsou pa ban demostrá ku nos stima nos pais, i partisipá na e akshon di limpiesa grandi aki. Pero no lag’é keda na e dia di 18 di sèptèmber so, pero pa sigui mantené nos Kòrsou limpi.

...Minister di Salubridat, Medio Ambiente i Naturalesa, sra. Dorothy Pietersz-Janga ta risibí un folder for di man di direktor di sektor di GMN sr. Gabriel Murray...

Aña pasá a rekohé 2.8 mion kilo di shushi. Minister a bisa ku e idea no ta pa surpasá e kantidat di kilo menshoná e aña aki.

E mandatario a pidi pa despues di limpiesa sigui mantené nos isla limpi, nos kayanan, mondi i tur otro sitio ku ta dùmp shushi. Baha man na uso di plèstik tambe kual ta un dje faktornan di shushedat.

Riba e pregunta di prensa si ta bin kampaña di konsientisashon riba limpiesa, e mandatario a bisa ku e pandemia aki a tuma tur akshon, pero e ta trahando riba plan pa bin bèk pa limpiesa tuma lugá na Kòrsou, i tambe programanan di konsientisashon.

Mester bisa ku henter luna di sèptèmber ta ser konsiderá komo unu di limpiesa.